Angliyalik futbolchi Raheem Sterling Niderlandiyaning "Feyenoord" klubi safidagi ilk o'yinidan so'ng noxush vaziyatga tushib qoldi. Erediviziya doirasida "NAC Breda" jamoasiga qarshi kechgan va 3:3 hisobida yakunlangan bahsda Sterling asosiy tarkibda maydonga tushdi. Uchrashuvdan keyingi matbuot anjumanida jurnalistlardan biri futbolchining gol ura olmagan vaziyatini eslab, istehzo bilan kulgan. Bu holat Sterlingning g'azabini keltirdi. Bu haqda goal.com xabar beradi.
Jurnalistning "Gol urishing kerak edi, shunday emasmi?" degan savoliga Sterling jiddiy ohangda javob qaytardi. U jurnalistga qarab: "Kulishing kerak emas, do'stim! Bu shunchaki o'yin, men hali sport formasini tiklab olyapman. Imkoniyat bo'ldi, lekin undan foydalana olmadim. Keyingi safar albatta gol urishga harakat qilaman", deya ta'kidladi. Futbolchi o'z standartlariga ko'ra bunday vaziyatlarda gol urishi shartligini tan oldi.
Uchrashuvning 64 daqiqasida zaxiraga olingan Sterling maydonda ko'proq qolishni istaganini yashirmadi. Biroq u murabbiy Robin van Persining qarorini hurmat qilishini bildirdi. Sterlingning "Feyenoord"dagi debyuti tanqidlar ostida qolgan bo'lsa-da, uning sobiq jamoadoshi Jack Grealish ijtimoiy tarmoqlarda futbolchini himoya qilib chiqdi. Grealish uzoq vaqt maydonga tushmagan o'yinchini kamsitish noto'g'ri ekanini ta'kidlab, muxlislarni hurmatli bo'lishga chaqirdi.
Hozirda "Feyenoord" turnir jadvalida ikkinchi o'rinda bormoqda, ammo peshqadam "PSV"dan ancha ortda qolgan. Sterling "Chelsi" bilan shartnomasini bekor qilganidan so'ng, Niderlandiyada o'zini ko'rsatishga va tanqidchilarga javob qaytarishga tayyorligini bildirmoqda.
“Zamin”ni Telegramʻda oʻqing!
