O‘zbekiston milliy terma jamoasi sardori Eldor Shomurodov joriy mavsum oldidan “Roma”ni tark etib, Turkiyaning “Istanbul Bashakshehir” jamoasiga ko‘chib o‘tganidan keyin haqiqiy ma’noda ochilib ketdi. Ilgari ham mehnatsevarligi va maydondagi kurashchanligi bilan ajralib turardi, ammo Istanbulda u faqat “ishchi hujumchi” emas, natija beruvchi gol mashinasiga aylandi.
Qizig‘i shundaki, Eldor o‘tgan mavsumning ikkinchi yarmini Klaudio Raneri qo‘l ostida ancha yuqori darajada o‘tkazganiga qaramay, rimliklar uni qo‘ldan chiqardi. “Roma” rahbariyati o‘zbek hujumchisi o‘rniga Angliyadan yosh forvard Evan Fergyusonni olib keldi. Ammo vaqt o‘tishi bilan bu qarorning bahosi chiqyapti: Rimda bir tanlov qilindi, Istanbulda esa Shomurodov o‘z javobini maydonda beryapti.
“Roma” hayotini doimiy yoritib boradigan forzaroma.info sayti ekspertlari bu masalaga alohida to‘xtab, rimliklar xatoga yo‘l qo‘ygan bo‘lishi mumkinligini yozdi. Ularga ko‘ra, “Roma” bu qaroridan yetarlicha afsuslana boshlagan: bosh murabbiy Jan-Pero Gasperini mavsumning eng muhim pallasida Shomurodovning jamoada qolishiga umuman qarshi bo‘lmasdi.
Eng ta’sirli raqamlar esa hech narsani yashirmaydi: Shomurodov o‘z o‘rniga kelgan Evan Fergyusondan besh baravar ko‘p gol urmoqda. Turkiya chempionatida u Viktor Osimxen va Mauro Ikardi kabi A Seriya “havosi”ni olgan mashhur yulduzlarni ham ortda qoldirgani qayd etildi. Bugungi kunda Superligada 16 ta gol urib turgan Eldor, agar “Roma”da qolganida, qishda kelgan va to‘purarlik mahoratini ko‘rsatayotgan Doniell Malen bilan juda mos sherik bo‘lishi mumkin edi.
Fergyuson uchun esa mavsum ancha erta “so‘nib” qolgani aytiladi. Eldor esa aksincha, Turkiya chempionati to‘purarlar poygasida jonli kurash olib boryapti va faqat nigeriyalik Pol Onuachudan ortda qolyapti, xolos. Shu bilan birga, to‘purarlar bahsida Shomurodov Mauro Ikardi va Taliskadan uchta, Viktor Osimxen va Marko Asensiodan to‘rtta golga oldinda borayotgani ta’kidlanadi — bu esa uning mavsumdagi barqarorligini yanada yorqin ko‘rsatadi.
Moliyaviy jihat ham qiziq. “Istanbul Bashakshehir” rimliklar bilan ijara shartnomasi tuzganda, agar jamoa Superligadagi o‘rnini saqlab qolsa, Eldor Shomurodovning transfer huquqini 2,8 million yevro to‘lab to‘liq sotib olishga kelishgan. Ta’kidlanishicha, bu — “Roma” o‘zini ko‘rsata olmagan va A Seriyada atigi uchta gol urgan Evan Fergyuson uchun to‘lagan 3 million yevrodan ham arzonroq summa.
Eng muhim nuqta: “Bashakshehir” bu mavsum ligada qolish uchun emas, aksincha yevrokuboklar yo‘llanmasi uchun kurashmoqda. Ayni paytda istanbulliklar Turkiya chempionatidagi an’anaviy kuchli klublar — “Galatasaroy”, “Fenerbahche”, “Trabzonspor” va “Beshiktosh”dan keyin beshinchi o‘rinda joylashgan. Va bu natijada Shomurodovning qimmatli gollari hal qiluvchi rol o‘ynayotgani ochiq aytilyapti. Shu bois, forzaroma.info yozishicha, “Istanbul Bashakshehir” endi o‘zbek hujumchisini qo‘ldan chiqarishni istamaydi.
Statistika esa Eldorning mavsumni qanday o‘tkazayotganini yanada aniq ko‘rsatadi: u joriy mavsumda “Istanbul Bashakshehir” safida barcha turnirlarda 35 ta uchrashuv o‘tkazib, 17 ta gol va 5 ta assist qayd etdi. Shu tariqa, 30 yoshli futbolchimiz faoliyatidagi eng sermahsul mavsumni o‘tkazmoqda.
Bundan tashqari, Transfermarkt portali ham Shomurodovning bahosini qayta ko‘rib chiqdi: “Roma”da 4 million yevrogacha tushib qolgan transfer narxi 2026 yilda 7 million yevroga ko‘tarildi. Demak, Eldor faqat maydonda emas, bozorda ham qayta “qadr topyapti”.
Qisqasi, bu hikoya oddiy transfer emas: bir klub “yo‘q” dedi, boshqasi ishonch bildirdi — natijada Shomurodov o‘ziga ishongan joyda porladi. Endi esa hamma savol bitta: Eldor shu sur’atni oxirigacha ushlab, Turkiya to‘purarlar poygasida ham nufuzli cho‘qqiga chiqib oladimi? Mavsum oxiri juda qiziq bo‘ladi.
“Zamin”ni Telegramʻda oʻqing!
