Angliya Premer-ligasining yetakchi klublaridan biri hisoblangan «Manchester Siti» rahbariyati so‘nggi vaqtlarda bir qator yirik jamoalar diqqat markaziga tushgan «Nottingem Forest» yarim himoyachisi Elliot Andersonni o‘z safiga qo‘shib olish niyatida jiddiy ish olib bormoqda. Manchesterliklar futbolchining transferi amalga oshishiga katta umid bog‘lagan.
Ma’lum qilinishicha, qishki transfer oynasida Mark Gexi hamda Antuan Semeno kabi futbolchilar uchun ancha mablag‘ sarflagan «shaharliklar» yozgi transfer davrida ham tarkibni yanada kuchaytirishni rejalashtirmoqda. Ayniqsa, jamoa mutaxassislari markaziy yarim himoya hamda o‘ng qanot himoyasi pozitsiyalarini mustahkamlashni ustuvor vazifalardan biri sifatida ko‘rmoqda.
TEAMtalk nashri tarqatgan ma’lumotlarga ko‘ra, «Manchester Siti» klubi Elliot Andersonni yarim himoya chizig‘ini kuchaytirish uchun asosiy transfer nishoni sifatida belgilab olgan. Futbolchiga boshqa bir qator nufuzli klublar ham jiddiy qiziqish bildirayotganiga qaramay, manchesterliklar uni o‘z loyihasiga jalb qilishga ishonch bildirmoqda.
«Siti»ning bu qaror qabul qilishiga yana bir nechta omillar ham sabab bo‘lmoqda. Jumladan, jamoaning tajribali yarim himoyachisi Bernardu Silva bilan tuzilgan shartnoma joriy mavsum yakunida tugashi kutilmoqda. Shuningdek, tizza jarohatidan keyin avvalgi yuqori darajasini namoyish eta olmayapti degan fikrlar bildirilayotgan Rodrining kelajagi ham turli muhokamalarga sabab bo‘lyapti. Ayrim manbalarda ispaniyalik yarim himoyachi «Real Madrid» safiga o‘tishi mumkinligi haqida ham gap-so‘zlar tarqalgan.
Shu bois «Manchester Siti» rahbariyati kelajakni hisobga olgan holda yarim himoya chizig‘ini yosh va istiqbolli futbolchilar bilan kuchaytirishni maqsad qilgan. Bu borada 23 yoshli Elliot Anderson jamoa uchun eng maqbul nomzodlardan biri sifatida qaralmoqda.
Biroq bu transfer oson kechmasligi aniq. Chunki «Nottingem Forest» o‘z yetakchi futbolchilaridan birini osonlikcha qo‘yib yubormoqchi emas. Manbalarga ko‘ra, manchesterliklar ushbu transferni amalga oshirish uchun 90 million funt sterlingdan ortiq mablag‘ni sarflashiga to‘g‘ri kelishi mumkin.
Shu tariqa, yozgi transfer oynasi yaqinlashgani sayin Elliot Anderson atrofidagi transfer muhokamalari yanada qizib borishi kutilmoqda. Muxlislar esa iqtidorli yarim himoyachining kelgusi manzili qayer bo‘lishini katta qiziqish bilan kuzatmoqda.
“Zamin”ni Telegramʻda oʻqing!
