Kecha shaxmat maydonida hamyurtimiz Javohir Sindarov uchun ikki muhim va quvonchli voqea sodir bo‘ldi. Birinchidan, u “Grand Chess Tour” musobaqasining to‘liq ishtirokchisi sifatida ro‘yxatdan o‘tdi va barcha turlarida o‘z salohiyatini namoyon etish imkoniyatiga ega bo‘ldi. Ikkinchidan, Sindarov to‘satdan kuchli raqibi Praggni mag‘lub etdi va turnir jadvalida peshqadamlikni davom ettirmoqda.
Hamyurtimiz kechagi o‘yin haqida fikr bildirdi va shaxmat muhlislariga qiziqarli tafsilotlarni taqdim etdi:
“Pragnanandxa vaqt bosimida aʼlo darajada o‘ynaydi, lekin menimcha, uning pozitsiyasi besh daqiqalik o‘yin uchun ancha murakkab edi. 33.c5 qurbonligisiz ham, u uchun vaziyat juda qiyin bo‘ldi. Keyin u c2 da zarbani o‘tkazib yubordi va men uning buni payqamaganini bilishdan xursandman.
Pragg haqiqatan ham juda kuchli raqib. Biz bolaligimizdanoq tez-tez o‘ynardik va u deyarli har doim meni mag‘lub etardi – hisob taxminan 4:1 yoki 5:1 atrofida edi. Lekin bu o‘yin juda keskin va raqobatli edi va men vaqt bosimida yaxshi pozitsiyani qo‘lga kiritganim uchun omadli bo‘ldim”, — dedi Sindarov.
Shu tariqa, hamyurtimiz nafaqat shaxmat bahsida o‘z salohiyatini ko‘rsatdi, balki turnirda peshqadamlikni saqlab qoldi. Bu g‘alaba Sindarovning xalqaro maydondagi obro‘sini yana-da oshiradi va muxlislar uchun katta quvonch manbai bo‘ldi.
“Zamin”ni Telegramʻda oʻqing!
