Iliya Topuriya Islom Maxachev bilan bog‘liq jang atrofidagi bir qator masalalarga ochiqlik kiritib, muxlislar o‘rtasida katta muhokama uyg‘otdi.
Uning so‘zlariga ko‘ra, dastlab UFC tomonidan Maxachevga qarshi jang taklif qilingan va u bu taklifni qabul qilgan. Topuriyaning aytishicha, u uxlashga yotganidan so‘ng, yarim tunda vaziyat butunlay o‘zgargan.
U UFC tomonidan juda ko‘p qo‘ng‘iroqlar bo‘lganini taʼkidlab, unga Maxachev jarohat olgani va uning o‘rniga Jastin Getjiga qarshi oktagonga chiqish taklifi berilganini maʼlum qildi. Bu esa jang tayyorgarligi atrofidagi vaziyatni yana-da qizg‘inlashtirgan.
Shu bilan birga, Topuriya Maxachev tomonidan aytilgan “katta pul talab qiladi” degan gaplarga ham javob qaytardi. U bu daʼvolarni qatʼiy rad etib, ularni asossiz deb atadi.
“Bu yolg‘on. Men haqiqatni bilaman. Bir jangchi boshqa jangchining qancha pul so‘rashini muhokama qilmasligi kerak. Men hech qachon boshqalarning daromadini hisoblamayman,” dedi u.
Topuriyaning fikricha, Maxachev avval ham bahonalar keltirgan va hozir ham turli sabablar orqali jangdan qochish haqida tasavvur uyg‘otmoqda. U bu holatni sport nuqtai nazaridan to‘g‘ri emas deb baholadi.
Umuman olganda, bu bayonotlar UFC yengil vazn divizionidagi raqobat va keskinlikni yana-da kuchaytirib yubordi, muxlislar esa ehtimoliy jangni katta qiziqish bilan kutmoqda.
“Zamin”ni Telegramʻda oʻqing!
