“Chelsi” bosh murabbiyi Liam Rosenior yarimhimoyachi Enso Fernandes kechirim so‘raganiga qaramasdan, uni "Manchester Siti"ga qarshi bo‘ladigan muhim o‘yin qaydnomasiga kiritmadi.
Murabbiy vaziyat haqida ochiq gapirib, futbolchi bilan bir necha bor jiddiy suhbatlar o‘tkazilganini tasdiqladi. Uning aytishicha, Enso o‘z xatosini tan olgan va klub hamda murabbiydan uzr so‘ragan.
“Men Enso bilan ikki-uch, hatto to‘rt marta juda samarali suhbat o‘tkazdim. U mendan ham, klubdan ham kechirim so‘radi. Biz bu masalani yakshanba kuni bo‘ladigan muhim uchrashuvdan keyin batafsil hal qilamiz,” — dedi Rosenior.
Shu bilan birga, murabbiy bu holatni oddiy intizomiy masala emas, balki jiddiy ichki vaziyat sifatida baholadi. Uning taʼkidlashicha, inson xato qilishi tabiiy, ammo har bir xato o‘z oqibatiga ega bo‘lishi kerak.
“Bu juda og‘ir masala bo‘yicha jiddiy muhokama bo‘ldi. Men Ensoning shaxsiyatiga yoki xarakteriga shubha qilmayman. Unga ishonaman. Ammo har qanday xato uchun javobgarlik bo‘lishi shart. Jazoni bekor qilib bo‘lmaydi,” — deya qo‘shimcha qildi u.
“Chelsi” rahbariyati futbolchidan kelajakda professional darajada yuqori natijalar kutishini bildirmoqda. Murabbiy esa Enso Fernandes kelgusida yana o‘zining eng yaxshi formasiga qaytishiga umid bildirgan.
Eslatib o‘tamiz, argentinalik yarimhimoyachi avvalroq "Real Madrid"ga o‘tish varianti haqida gapirganidan so‘ng jamoa tarkibidan vaqtincha chetlatilgan edi.
Hozircha klubda asosiy pozitsiya aniq: intizom birinchi o‘rinda, natija esa shundan keyin.
“Zamin”ni Telegramʻda oʻqing!
