O‘zbekiston Respublikasi Prezidenti Shavkat Mirziyoyev Xalqaro shaxmat federatsiyasining Nomzodlar turniri g‘olibi Javohir Sindorov bilan telefon orqali muloqot qildi. Bu haqda Prezident matbuot xizmati maʼlum qildi.
Davlat rahbari yosh grossmeysterni O‘zbekiston shaxmat tarixida ilk bor mazkur nufuzli musobaqada g‘olib bo‘lib, haqiqiy tarixiy natija qayd etgani bilan samimiy tabrikladi.
Suhbat davomida taʼkidlanishicha, Javohir Sindorov turnirda ilgari hech kim yeta olmagan natijani ko‘rsatib, 13 ta partiyada 6 ta g‘alabaga erishgan. Bu esa shaxmat olamida kam uchraydigan o‘ta noyob yutuq sifatida baholandi.
Prezident yosh sportchi dunyodagi eng kuchli shaxmat ustalariga qarshi har bir bahsda yuksak mahorat, jasorat va iroda namoyon etganini alohida qayd etdi. Shu bilan birga, uni oldinda yana-da masʼuliyatli bosqich — jahon toji uchun kurash kutayotganini taʼkidlab, yangi zafarlar tiladi.
Shuningdek, 2026 yil Samarqandda bo‘lib o‘tadigan 46-Butunjahon shaxmat olimpiadasida Javohir Sindorovning ishtiroki jamoaga katta ruh va ishonch bag‘ishlashi aytildi.
Davlat rahbari ushbu tarixiy yutuq munosabati bilan shaxmatchining ota-onasi, ustozlari va yaqinlarini ham samimiy tabrikladi.
Javohir Sindorov esa bildirilgan yuksak eʼtibor va ishonch uchun Prezidentga chuqur minnatdorlik izhor qildi.
“Zamin”ni Telegramʻda oʻqing!
