Angliya Premyer-ligasidagi eng boy klublardan biri sanalgan "Nyukasl Yunayted" rahbariyati bosh murabbiy Eddi Xau bilan xayrlashish ehtimoli yuzaga kelsa, uning o‘rniga Joze Mourinyoni taklif qilish variantini ko‘rib chiqmoqda.
Garchi hozircha Eddi Xau klub rahbariyati ishonchini saqlab turgan bo‘lsa-da, so‘nggi vaqtlarda jamoa ichida uning imkoniyatlari chegarasiga yetgani haqida fikrlar kuchaymoqda. Klub ichki muhitida murabbiydan kutilgan natijalar to‘liq amalga oshmayotgani haqida ham muhokamalar paydo bo‘lgan.
Shu bilan birga, muxlislar tomonidan ham norozilik ovozlari ortib bormoqda. Hozirgi kunda “Nyukasl” Premyer-ligada 14-o‘rinda borayotgani bu tanqidlarni yana-da kuchaytirgan.
Agar Xau mavsum oxirida jamoani tark etsa yoki rahbariyat uni isteʼfoga chiqarishga qaror qilsa, asosiy nomzod sifatida Joze Mourinyo ko‘rilmoqda. U ilgari “Chelsi”, “Manchester Yunayted” va “Tottenxem” kabi top-klublarni boshqargan tajribali mutaxassis hisoblanadi.
Talksport maʼlumotiga ko‘ra, klubning saudiyalik egalari ehtimoliy o‘zgarish ssenariysi uchun bir necha variantlarni tayyorlab qo‘ygan. Ular orasida Mourinyo bilan birga Roberto Manchini va mavsum oxirida “Bornmut”ni tark etishi mumkin bo‘lgan Andoni Iraola ham bor.
Ayni paytda Lissabonning “Benfika” klubida faoliyat olib borayotgan Mourinyo “Nyukasl”ga nisbatan simpatiyasini ilgari ham yashirmagan. Bu esa uning nomzodini yana-da qiziqarli qiladi, ayniqsa ser Bobbi Robson bilan bog‘liq tarixiy aloqa sabab.
Qisqasi, “Nyukasl”da vaziyat keskin bosqichga kirib bormoqda — kelajakda jamoani kim boshqarishi hali katta savol.
“Zamin”ni Telegramʻda oʻqing!
