Messi «Inter Mayami» klubidagi kelajagi bo'yicha yakuniy qarorni qachon qabul qilishi ma'lum bo'ldi
Argentina terma jamoasining sobiq hujumchisi Serxio Aguero yaqin do'sti Lionel Messining «Inter Mayami» klubidagi kelajagi borasidagi rejalarini ochiqladi. Agueroning so'zlariga ko'ra, sakkiz karra «Oltin to'p» sohibi AQShdagi faoliyatini davom ettirish masalasini jismoniy holati va oilaviy xotirjamligidan kelib chiqib hal qiladi. Hozirda Messi Mayami shahrida o'zini baxtli his qilmoqda va mahalliy muxlislarning mehridan mamnun. Bu haqda Goal.com xabar beradi.
Aguero Messining qarori yaqin oylarda, aniqrog'i Jahon chempionati va MLS mavsumi yakunlangach ma'lum bo'lishini ta'kidladi. «Leo har doim o'z ko'ngliga quloq soladi. Agar u o'zini jismonan baquvvat his qilsa va g'alabalarga bo'lgan ishtiyoqi so'nmasa, o'ynashda davom etadi. Menimcha, u hozircha 2028 yil haqida o'ylayotgani yo'q, ammo uning darajasidagi futbolchi uchun maydonda besh daqiqa harakat qilish ham katta natija», — dedi Aguero.
Shuningdek, Aguero «Barselona» muxlislarining orzusi haqida ham to'xtalib o'tdi. Uning fikricha, Messining Kataloniya klubiga qaytishi va «Kamp Nou»da munosib tarzda xayrlashishi har bir muxlis uchun haqiqiy ertak bo'lar edi. Biroq, bu transfer ham futbolchining jismoniy imkoniyatlariga bog'liq bo'lib qolmoqda. Messi «Barselona» safida 778 ta o'yinda 672 ta gol urib, klub tarixidagi eng buyuk afsonaga aylangan.
Sobiq hujumchi braziliyalik Neymar bilan bog'liq mish-mishlarga ham munosabat bildirdi. Aguero Neymarning «Inter Mayami»ga o'tib, Messi va Luis Suares bilan yana bir bor «MSN» uchligini tiklashini juda xohlamoqda. Uning ta'kidlashicha, bunday afsonalarning MLSda to'p surishi Amerika futboli rivoji va tomoshabopligi uchun ulkan ahamiyatga ega. Biroq, Neymarning Yevropaga qaytishi ehtimoli past, chunki u hozirda ko'proq futboldan zavq olish bosqichida.
“Zamin”ni Telegramʻda oʻqing! 
