Jadon Sancho «Borussiya Dortmund» klubiga qaytishga rozilik berdi
Jadon Sancho "Borussiya Dortmund" klubiga qaytishga rozilik berdi va hozirda tomonlar shaxsiy shartnoma shartlarini muhokama qilmoqda. Futbolchi Germaniyaga qaytish istagi tufayli "Manchester Yunayted"dagi yuqori maoshining sezilarli darajada kamayishiga ham rozi bo'lgan. Mazkur transfer tekinga amalga oshirilishi kutilmoqda, chunki hujumchining ingliz klubi bilan amaldagi kelishuvi yakuniga yetmoqda. Jamoa rahbariyati va murabbiylar shtabi Sanchoning iqtidoriga tayanib, uni tarkibga qo'shib olishni qo'llab-quvvatlamoqda.
Angliyalik hujumchi Jeydon Sanchoning «Borussiya Dortmund» klubiga qaytishi tobora oydinlashmoqda. Sky nashri xabariga ko'ra, futbolchining vakillari va Germaniya klubi o'rtasida yangi muzokaralar o'tkazilgan. Hozirda «Aston Villa»da ijara asosida to'p surayotgan 26 yoshli vinger Dortmundga qaytish istagini klub rahbariyatiga ma'lum qilgan. Bu haqda Goal.com xabar beradi.
Tomonlar shaxsiy shartnoma shartlarini muhokama qilishni boshladi. Sancho «Manchester Yunayted»da oladigan yillik 15 mln yevro miqdoridagi maoshining sezilarli darajada kamayishiga rozi bo'lgan. «Borussiya Dortmund» rahbariyati bir necha hafta oldin futbolchini moliyaviy cheklovlar haqida ogohlantirgan edi. Sanchoga «Yuventus» kabi klublardan takliflar bo'lishiga qaramay, u aynan Bundesligaga qaytishni afzal ko'rmoqda.
Sanchoning «Manchester Yunayted» bilan amaldagi shartnomasi joriy mavsum yakunida tugaydi, shu sababli nemis klubi transfer uchun to'lov amalga oshirmaydi. Futbolchi 2021-yilda 85 mln yevro evaziga Angliyaga yo'l olgan edi, biroq u yerda kutilgan o'yinni ko'rsata olmadi. Murabbiy Erik ten Xag bilan yuzaga kelgan kelishmovchilikdan so'ng, u 2024-yilning yanvarida Dortmundga vaqtincha qaytib, jamoaning Yevropa Chempionlar ligasi finaliga chiqishiga yordam bergandi.
«Borussiya Dortmund» bosh murabbiyi Niko Kovach Sanchoning transferini qo'llab-quvvatlamoqda. Xorvatiyalik mutaxassis futbolchining intizomi bilan bog'liq muammolarga qaramay, uning iqtidoriga ishonch bildirgan. Sancho jamoani tark etishi kutilayotgan Julian Brandtning o'rnini egallashi mumkin. Klub sport direktori Lars Rikkenning ta'kidlashicha, jamoaga sifatli va moliyaviy jihatdan qulay bo'lgan hujumchi zarur.
Izohlar 0
…