«Arsenal» himoyachisi Vilyam Saliba Angliya Premyer-ligasidagi chempionlik poygasi hal qiluvchi pallaga kirgani haqida jamoadoshlarini ogohlantirdi. Fransiyalik futbolchi ketma-ket mag'lubiyatlardan so'ng jamoa bor kuchini ishga solishi shartligini ta'kidladi. Uning fikricha, London klubi o'tgan mavsumdagi xatoni takrorlamaslik uchun har bir o'yinda maksimal fidoyilik ko'rsatishi lozim. Bu haqda Goal.com xabar beradi.
Mikel Arteta shogirdlari «Bornmut» va «Man Siti»ga qarshi bahslarda imkoniyatni boy berib, turnir jadvalida ikkinchi o'ringa tushib ketdi. Hozirda «shaharliklar» to'plar nisbatiga ko'ra peshqadamlik qilmoqda. Aprel oyidagi an'anaviy pasayishdan so'ng, «kanonirlar» chempionlik umidini saqlab qolish uchun navbatdagi turda «Nyukasl»ga qarshi maydonga tushadi.
Klub rasmiy saytiga bergan intervyusida Saliba jamoa a'zolarini maydonda borini berishga undadi. «Biz xotirjam bo'lishimiz va maydonda o'lishimiz kerak, chunki hozir ayni vaqti. Muxlislar, jamoa va xodimlar — barchamiz birlashishimiz shart. Mavsum tugaganidan keyin kech bo'ladi, hamma narsani hozir hal qilish lozim», — dedi himoyachi.
«Arsenal» 2004-yildan buyon Premyer-ligada g'olib chiqa olmayotgani Saliba uchun ham shaxsiy motivatsiyaga aylangan. Angliyadagi faoliyati davomida ikki marta ikkinchi o'rinni egallagan futbolchi bu safar oltin medallarni qo'lga kiritishga ishonmoqda. Uning so'zlariga ko'ra, jamoa ruhiy bosimga tayyor va orzularni amalga oshirish uchun qolgan besh haftada xato qilishga haqqi yo'q.
