«Arsenal» hujumchisi Kay Xaverts Angliya Premyer-ligasi doirasida «Nyukasl»ga qarshi kechgan bahsda jiddiy jarohat oldi. O'yinning birinchi bo'limida londonliklar goliga assistentlik qilgan germaniyalik futbolchi, ko'p o'tmay maydonga yiqildi va og'riqdan azob cheka boshladi. Tibbiy xodimlar yordamidan so'ng, 26 yoshli hujumchi 34-daqiqada maydonni oqsoqlangan holda tark etishga majbur bo'ldi. Bu haqda Goal.com xabar beradi.
Ekspert Tomas Xitslspergerning fikricha, futbolchining chov sohasida jarohat bo'lishi mumkin. Xaverts uzoq davom etgan tiklanish jarayonidan so'ng yanvar oyida safga qaytgan edi. Uning navbatdagi jarohati nafaqat «Arsenal»ning chempionlik poygasidagi imkoniyatlariga, balki Germaniya terma jamoasining Jahon chempionatidagi ishtirokiga ham xavf solmoqda.
Germaniya terma jamoasi ustozi Yulian Nagelsmann uchun bu katta yo'qotish bo'lishi mumkin. Avvalroq «Bavariya» hujumchisi Serj Gnabri ham jarohat sabab turnirni o'tkazib yuborishi ma'lum bo'lgan edi. Agar Xavertsning jarohati jiddiy bo'lib chiqsa, nemislar hujum chizig'ida asosiy yetakchilarsiz qolishi mumkin. Hozircha futbolchining aniq tashxisi va safga qaytish muddati ma'lum qilinmagan.
“Zamin”ni Telegramʻda oʻqing!
