«Arsenal» bosh murabbiyi Mikel Arteta «Nyukasl» ustidan qozonilgan 1:0 hisobidagi g'alabadan so'ng hakamlik darajasini keskin tanqid qildi. Mutaxassisning fikricha, raqib darvozaboni Nik Poup Viktor Gyokeresga nisbatan ishlatgan qo'polligi uchun maydondan chetlatilishi kerak edi. VAR tekshiruviga qaramay, hakam darvozabonga faqat sariq kartochka ko'rsatish bilan cheklandi. Bu haqda Goal.com xabar beradi.
Arteta so'nggi ikki o'yinda hakamlar uning jamoasiga nisbatan adolatsiz qarorlar qabul qilganini ta'kidladi. Murabbiy «Manchester Siti» bilan bahsda Abdukodir Husanov Kay Xavertsga nisbatan qoidani buzgan vaziyatda ham qizil kartochka berilmaganini eslatib o'tdi. Uning so'zlariga ko'ra, bunday muhim palladagi xatolar chempionlik poygasiga bevosita ta'sir ko'rsatmoqda.
«Men bu vaziyatni o'n marta ko'rib chiqdim. Agar siz futbol o'ynagan bo'lsangiz, bu aniq qizil kartochka ekanini bilasiz. Agar vaziyat teskari bo'lganda, bizning futbolchimiz maydondan haydalgan bo'lardi. Men mag'lub bo'lganimizda emas, balki g'alaba qozonganimizda ham haqiqatni gapirmoqdaman», — dedi Arteta o'yindan keyingi matbuot anjumanida.
G'alabaga qaramay, «Arsenal» tarkibida yo'qotishlar yuzaga keldi. Jamoa yetakchilari Kay Xaverts va gol muallifi Eberechi Eze jarohat sababli maydonni tark etishga majbur bo'ldi. Endilikda ularning Chempionlar ligasi yarim finali doirasidagi «Atletiko»ga qarshi uchrashuvda ishtirok etishi so'roq ostida turibdi.
