Angliya kubogi yarim finali doirasida «Uembli» stadionida bo'lib o'tgan «Lids» va «Chelsi» jamoalari o'rtasidagi bahsda hakamlik bilan bog'liq bahsli vaziyat yuzaga keldi. «Lids» hujumchisi Dominik Kalvert-Lyuin raqib himoyachisi Mark Kukurelyaning sochini tortgan bo'lsa-da, maydonda qolishga muvaffaq bo'ldi. Bu haqda Goal.com xabar beradi.
Ushbu holat VAR tizimi orqali uzoq vaqt davomida ko'rib chiqildi. Videotakrorlarda hujumchi «Chelsi» a'zosiga nisbatan qo'pollik ishlatgani aniq ko'ringan bo'lsa-da, hakamlar brigadasi futbolchini jazolashga asos topa olmadi.
Yakunda Kalvert-Lyuin hech qanday intizomiy chorasiz o'yinni davom ettirdi.
Mazkur voqea jamoatchilik orasida katta muhokamalarga sabab bo'ldi. Sababi, atigi ikki hafta oldin Premyer-liga doirasidagi «Manchester Yunayted» va «Lids» uchrashuvida Lisandro Martines aynan Kalvert-Lyuinning sochini tortgani uchun maydondan chetlatilgan edi.
Ekspertlar va muxlislar bir xil turdagi qoidabuzarlik uchun ikki xil qaror qabul qilinganidan norozi bo'lishmoqda. Hozircha hakamlar qo'mitasi ushbu qarama-qarshi qarorlar yuzasidan rasmiy munosabat bildirmadi.
“Zamin”ni Telegramʻda oʻqing!
