Konte «Napoli»dagi kelajagi haqidagi savollarni javobsiz qoldirdi

«Napoli» bosh murabbiyi Antonio Konte klub prezidenti Aurelio De Laurentiis bilan ochiqchasiga ziddiyatga borishni istamadi. «Latsio»ga qarshi o'z uyida o'tgan bahsdagi 0:2 hisobidagi mag'lubiyatdan so'ng, mutaxassis o'z kelajagi haqidagi savollarga javob berishdan qochdi. Bu haqda Goal.com xabar beradi.

Hozirda neapolliklar turnir jadvalida peshqadam «Inter»dan 12 ochko ortda qolmoqda. Skudetto uchun kurash deyarli yakunlangani sababli, OAVda Kontening yozda Italiya terma jamoasini boshqarishi haqidagi xabarlar ko'paygan.

De Laurentiis ham murabbiy bilan xayrlashish mumkinligiga ishora qilgan edi.

«Bu prezidentning muammosi, u xohlagan gapini aytishi mumkin, lekin mening unga javobim yo'q. Agar unga aytadigan gapim bo'lsa, buni ommaga emas, shaxsiy uchrashuvda aytaman.

Jimlik saqlash chempionat yakunigacha hamma uchun foydaliroq», — dedi Konte DAZN telekanaliga bergan intervyusida.

Murabbiy doimiy mish-mishlar uning g'ashiga tegayotganini va ismi gazeta sahifalarini to'ldirish uchun ishlatilayotganini ta'kidladi. Uning fikricha, hozirgi vaziyatda asosiy e'tiborni shartnomaga emas, balki maydondagi natijalarga qaratish lozim.

«Latsio» bilan o'yin haqida gapirar ekan, Konte jamoasining kamchiliklarini tan oldi. «Napoli» 70 foiz vaqt davomida to'pga egalik qilgan bo'lsa-da, raqib darvozasiga birorta ham aniq zarba bera olmadi.

Murabbiy jamoani o'yinga yetarlicha tayyorlay olmaganini e'tirof etdi.

Mavsum yakunlanishiga beshta tur qolganida, «Napoli» beshinchi o'rindagi «Komo»dan sakkiz ochko oldinda bormoqda. Konte uchun asosiy vazifa jamoani kuchli to'rtlikda saqlab qolish va kelasi mavsumda Yevropa Chempionlar ligasi yo'llanmasini qo'lga kiritish bo'lib qolmoqda.