"Portu" klubi prezidenti Andre Villas-Boas va "Benfika" bosh murabbiyi Joze Mourinyo o'rtasidagi raqobat ularning ko'p yillik do'stligiga xalaqit bermayapti. Portugaliya chempionligi uchun kurashayotgan sobiq hamkasblar o'zaro hurmatni saqlab qolgan holda muloqotni davom ettirmoqda. Bu haqda Goal.com xabar beradi.
Villas-Boas va Mourinyo uzoq vaqt davomida birga faoliyat yuritgan. Ular "Portu", "Chelsi" va "Inter" klublarida ko'plab ichki va xalqaro sovrinlarni qo'lga kiritgan.
Villas-Boas yetti yil davomida Mourinyo shtabida raqiblarni tahlil qilish bo'yicha mutaxassis bo'lib ishlagan.
Hozirda ular Portugaliyaning ikki ashaddiy raqib klubi sharafini himoya qilmoqda. Villas-Boasning so'zlariga ko'ra, Mourinyo "Benfika" bilan shartnoma imzolashidan oldin "Portu" muxlislari unga munosib hurmat ko'rsatish imkoniyatiga ega bo'lgan.
«Hozir u "Benfika" murabbiyi va biz vaqti-vaqti bilan xabar almashib turamiz. Har birimiz o'z klubimiz manfaatlarini hurmat qilamiz, chunki ikkalamiz ham bitta maqsad — chempionlik uchun kurashyapmiz», — dedi Villas-Boas.
Ayni paytda turnir jadvalida "Portu" 76 ochko bilan peshqadamlik qilmoqda va uchinchi o'rindagi "Benfika"dan yetti ochko oldinda bormoqda. Mourinyo boshchiligidagi jamoa yakshanba kuni ikkinchi o'rindagi "Sporting"ga qarshi muhim bahsda maydonga tushadi.
“Zamin”ni Telegramʻda oʻqing!
