Kompani "PSJ"ga qarshi uchrashuvda Devisni asosiy tarkibga kiritdi

"Bavariya" bosh murabbiyi Vinsent Kompani Chempionlar ligasi doirasida "PSJ"ga qarshi kechgan o'yinda kutilmagan qarorga keldi. U chap qanot himoyasida Konrad Laymer o'rniga Alfonso Devisni asosiy tarkibda maydonga tushirdi. Bu haqda Goal.com xabar beradi.

Ushbu qaror ko'pchilikka Pep Gvardiolaning muhim o'yinlardagi taktik o'zgarishlarini eslatib yubordi. Laymer va Yosip Stanisich joriy mavsumda jamoaning eng muhim o'yinchilaridan biri bo'lib kelayotgan edi.

Birinchi bo'lim oxirida Devis o'z jarima maydonchasida to'pni qo'li bilan o'ynadi. Natijada Usmon Dembele penaltidan unumli foydalanib, "PSJ"ni oldinga olib chiqdi.

Shunga qaramay, kanadalik himoyachi o'yin davomida ishonchli harakat qildi. Uning uzatmalari aniqligi 96 foizni tashkil etdi va bu borada jamoada eng yaxshi natijani qayd etdi.

Tanaffusdan so'ng Devis o'rniga maydonga tushgan Laymer esa o'zini to'liq ko'rsata olmadi. Uning uzatmalari aniqligi bor-yo'g'i 74 foizni tashkil qildi va himoyada xatolarga yo'l qo'ydi.

Kelasi haftada Myunxenda bo'lib o'tadigan javob uchrashuvida qanot himoyachilari pozitsiyasi uchun raqobat yanada kuchayishi kutilmoqda.

Nodirbek Razzokov

«ZAMIN.UZ» muharriri

+ Zamin.uz saytini Google'ga qo'shing