"Chelsi" vingeri Mixaylo Mudrik doping qoidalarini buzgani uchun 4 yilga chetlatilganidan so'ng Sport arbitraj sudiga (CAS) rasmiy apellyatsiya berdi. Ukraina terma jamoasi a'zosi odatiy testda ijobiy natija qayd etilganidan beri qariyb 18 oy davomida maydonga tushmadi. Bu haqda Goal.com xabar beradi.
Angliya futbol assotsiatsiyasi (FA) uzoq davom etgan tekshiruvlardan so'ng Mudrikka maksimal jazo — 4 yillik diskvalifikatsiya tayinladi. 25 yoshli futbolchi 2024 yil dekabr oyida vaqtinchalik chetlatilgan va 2025 yil iyun oyida unga rasmiy ayblov e'lon qilingan edi.
Hozirgi qoidalarga ko'ra, jazo muddati uning vaqtinchalik chetlatilgan vaqtidan boshlab hisoblanadi. Bu esa sobiq "Shaxtyor" vingerining 2028 yil dekabrigacha professional futbolga qaytishini imkonsiz qiladi.
CAS vakili BBC Sport nashriga 2026 yil 25 fevral kuni Mudrik tomonidan apellyatsiya kelib tushganini tasdiqladi.
Muammo meldoniy moddasi bilan bog'liq bo'lib, u nafas olish qobiliyati va chidamlilikni oshirishi mumkin. Xabarlarga ko'ra, Mudrik ushbu modda bilan 2024 yil oktyabr oyida Ukraina terma jamoasi yig'inida aloqada bo'lgan.
Futbolchi o'zining yagona ochiq bayonotida holatdan hayratda ekanligini va hech qachon taqiqlangan moddalarni ataylab ishlatmaganini ta'kidladi.
Mudrik hozirda xususiy murabbiy bilan mashg'ulotlarni davom ettirmoqda. U o'z huquqlarini himoya qilish uchun Pol Pogba, Tayson Fyuri kabi sportchilarning ishida qatnashgan Morgan Sports Law yuridik firmasi bilan shartnoma tuzdi.
"Chelsi" klubi va FA hozircha ushbu holat yuzasidan rasmiy izoh berishdan bosh tortdi.
“Zamin”ni Telegramʻda oʻqing!
