"Bavariya" klubining 2026-2027-yilgi mavsum uchun mo'ljallangan yangi liboslari dizayni haqida dastlabki ma'lumotlar tarqaldi. "Adidas" kompaniyasi bilan 50 yildan ortiq hamkorlik qilib kelayotgan klub bu safar klassik va retro uslubga tayanishga qaror qildi. Bu haqda Goal.com xabar beradi.
Asosiy uy libosi an'anaviy qizil rangda bo'lib, unda oltin rangli elementlar va to'q qizil chiziqlar aks etadi. Oltin rangli detallar oxirgi marta klubning 2012-2013-yilgi tarixiy g'alabali mavsumida ishlatilgan edi.
Shuningdek, futbolkalar orqasidagi yozuv o'zgarib, to'liq nom o'rniga qisqa "FC Bayern" varianti qo'llaniladi.
Mehmon libosi oq rangda bo'lib, unda to'q ko'k va qizil rangli bezaklar bo'lishi kutilmoqda. Ushbu to'plamda klubning 1966-yilda foydalanilgan tarixiy logotipi deyarli 25 yillik tanaffusdan so'ng yana qaytadi.
Uchinchi libos esa to'q kulrang yoki ko'k bazada qizil rangli chizgilar bilan dizayn qilinadi.
Yangi liboslarning rasmiy taqdimoti 2026 yil 16 may kuni Bundesliganing so'nggi turida "Kyoln"ga qarshi o'yinda o'tkazilishi rejalashtirilgan. Liboslar narxi nusxa (replica) versiya uchun 100 yevro, professional o'yinchilar varianti uchun esa 150 yevrogacha bo'lishi taxmin qilinmoqda.
“Zamin”ni Telegramʻda oʻqing!
