Real Madrid himoyachisi Ferland Mendy Espanyolga qarshi o‘yinda olgan jiddiy jarohati sababli uzoq muddatga safdan chiqdi. Dastlabki tekshiruvlar oddiy mushak jarohatini ko‘rsatgan bo‘lsa-da, keyingi chuqurlashtirilgan tibbiy ko‘riklar vaziyat ancha jiddiy ekanligini tasdiqladi. Bu haqda Goal.com xabar beradi.
Cadena Cope xabariga ko‘ra, fransiyalik futbolchining payi suyakdan butunlay uzilib ketgan. Bu holat jarrohlik amaliyotini va kamida bir yillik reabilitatsiya jarayonini talab qiladi. Shu tariqa, Mendy 2027-28 yilgi mavsum boshiga qadar yashil maydonga qayta olmasligi mumkin.
So‘nggi ikki yil davomida jarohatlar bilan qiynalib kelayotgan himoyachi uchun bu holat faoliyatini erta yakunlash xavfini ham keltirib chiqarmoqda. Klub tibbiy shtabi futbolchining avvalgi sport formasiga qaytishiga kafolat bera olmayapti.
Joriy mavsumda atigi 448 daqiqa maydonda harakat qilgan Ferland Mendy besh marta jarohat oldi. Real Madrid rahbariyati endilikda himoya chizig‘ini kuchaytirish va kelajakni rejalashtirish borasida qiyin tanlov oldida qoldi.
“Zamin”ni Telegramʻda oʻqing!
