Glen Jonson Xabi Alonsoni Chelsi boshqaruvini qabul qilishdan ogohlantirdi. Sobiq futbolchining fikricha, London klubi dunyo futbolidagi eng bosim yuqori boʻlgan joylardan biri hisoblanadi va bu yerda muvaffaqiyat qozonish yosh murabbiy uchun oʻta qiyin vazifa. Bu haqda Goal.com xabar beradi.
Rafa Benitez tajribasi bunga yaqqol misol boʻla oladi. Liverpul bilan Chempionlar ligasida zafar quchgan ispaniyalik mutaxassis 2012-yilda Chelsi boshqaruviga kelganida, muxlislar ishonchini qozona olmagan edi. Garchi u Yevropa ligasida gʻolib chiqqan boʻlsa-da, Liverpul bilan boʻlgan tarixiy aloqalari sababli „koʻklar“ muxlislari uni iliq kutib olishmagan.
Jonsonning taʼkidlashicha, Chelsi rahbariyati murabbiylarga moslashish uchun yetarli vaqt bermaydi. „Bu yerga kelib, darhol gʻalaba qozonish talab etiladi. Hatto sovrinlar yutgan tajribali murabbiylar uchun ham bunday bosim ostida ishlash deyarli imkonsiz vazifa“, — deydi u.
Alonso hozirda murabbiylik faoliyatidagi eng istiqbolli nomlardan biri sanaladi. Biroq, Chelsi kabi beqaror muhitda ishlash uning obroʻsiga putur yetkazishi mumkin. Mutaxassislar yosh murabbiy uchun bunday tavakkalchilik oʻzini oqlamasligini taʼkidlashmoqda.
“Zamin”ni Telegramʻda oʻqing!
