Londonning Arsenal klubi PSJ hujumchisi Bradley Barcolani oʻz safiga qoʻshib olish uchun jiddiy daʼvogarga aylandi. Mikel Arteta yangi mavsum oldidan hujum chizigʻini kuchaytirishni maqsad qilgan va fransiyalik futbolchini asosiy nishonlardan biri sifatida koʻrmoqda. Bu haqda Goal.com xabar beradi.
Sky Germany xabariga koʻra, Arsenal vakillari allaqachon futbolchining agentlari bilan dastlabki muzokaralarni boshlab yuborgan. Barcola oʻzining tezkorligi va birga-bir vaziyatlardagi mahorati bilan Arteta tizimiga mos kelishi kutilmoqda. Hozircha rasmiy taklif yuborilmagan boʻlsa-da, tomonlar oʻrtasidagi muloqotlar davom etmoqda.
Ushbu transfer poygasida Barselona va Liverpul klublari ham faollik koʻrsatmoqda. Kataloniyaliklar uzoq vaqtdan beri futbolchining oʻyinlarini kuzatib kelayotgan boʻlsa, Liverpul ham tarkibni yangilash maqsadida Barcola nomzodini koʻrib chiqmoqda.
22 yoshli futbolchi 2023-yilda Liondan PSJga oʻtganidan buyon oʻz oʻyinini sezilarli darajada kuchaytirdi. U Luis Enrike qoʻl ostida muhim oʻyinchiga aylangan boʻlsa-da, Yevropaning top klublari qiziqishi yozgi transfer oynasida katta raqobatni keltirib chiqarishi mumkin.
Barcolaning Parij klubi bilan amaldagi shartnomasi 2028-yilga qadar moʻljallangan. Shu sababli PSJ uni sotishga shoshilmayapti, biroq futbolchining oʻzi faoliyatini boshqa chempionatda davom ettirish imkoniyatlarini koʻrib chiqmoqda.
“Zamin”ni Telegramʻda oʻqing!
