Real Madrid murabbiyi Alvaro Arbeloa jamoa mashg‘ulotlarida Aurelien Tchouameni va Federico Valverde o‘rtasida yuz bergan janjal tafsilotlarining matbuotga sizib chiqqanidan qattiq g‘azabda. U ushbu holatni klub nishoniga nisbatan xiyonat va sodiqsizlik deb atadi. Bu haqda Goal.com xabar beradi.
Arbeloa klub rahbariyatining intizomiy choralarni tezkorlik bilan ko‘rganini yuqori baholadi. Futbolchilar o‘z xatolarini tan olib, uzr so‘rashganini taʼkidlagan murabbiy, ularni omma oldida ayblash niyati yo‘qligini bildirdi.
Murabbiyning so‘zlariga ko‘ra, yuqori darajadagi futbol muhitida bunday keskinliklar yuz berib turadi va bu odatiy hol. U o‘z faoliyati davomida ham shunga o‘xshash voqealarga guvoh bo‘lganini eslab, kiyim almashtirish xonasidagi gaplar o‘sha yerda qolishi kerakligini taʼkidladi.
Arbeloa mavsumdagi muvaffaqiyatsizliklar uchun javobgarlikni o‘z zimmasiga olishini aytib, jamoani diqqatni bo‘lajak o‘yinga qaratishga chaqirdi. Uning fikricha, ichki nizolarni tashqariga chiqarish klub qadriyatlariga zid harakatdir.
“Zamin”ni Telegramʻda oʻqing!
