Real Madrid mashg‘ulotlar bazasida yuz bergan jiddiy to‘qnashuvdan so‘ng Federico Valverde va Aurelien Tchouameni ustidan intizomiy ish ochdi. Mashg‘ulot vaqtida kelib chiqqan janjal oqibatida urugvaylik yarim himoyachi bosh qismidan jarohat olib, shifoxonaga yotqizildi. Bu haqda Goal.com xabar beradi.
Klub rasmiy bayonotiga ko‘ra, Valverde 14 kungacha bo‘lgan davolanish muddatini o‘tkazadi. Real Madrid rahbariyati ushbu holatni jamoa ichki tartib-qoidalarining qo‘pol ravishda buzilishi deb baholamoqda va har ikki futbolchini bir oygacha bo‘lgan muddatga ishdan hamda maoshdan chetlatish masalasini ko‘rib chiqmoqda.
Mundo Deportivo xabariga ko‘ra, futbolchilar 10 kundan 30 kungacha bo‘lgan muddatga diskvalifikatsiya qilinishi va jarimaga tortilishi mumkin. Klub ushbu vaziyatni o‘ta jiddiy deb hisoblamoqda va maxsus tergovchi tayinlab, guvohlar ko‘rsatmalari asosida rasmiy ayblov xulosasini tayyorlamoqda.
Ushbu voqea Real Madrid uchun juda noqulay pallaga to‘g‘ri keldi. Jamoa yaqinlashib kelayotgan Barselona bilan El-Klasiko bahsiga Valverde xizmatlarisiz tayyorgarlik ko‘rmoqda. Tchouamenining ham chetlatilishi ehtimoli jamoa yarim himoyasida katta bo‘shliqni yuzaga keltirishi mumkin.
“Zamin”ni Telegramʻda oʻqing!
