Liverpul bosh murabbiyi Arne Slot jamoasining Chelsi bilan kechgan 1:1 hisobidagi durangidan so‘ng muxlislar tomonidan bildirilgan noroziliklarga munosabat bildirdi. Enso Fernandesning goli mezbonlarning erta qo‘lga kiritgan ustunligini yo‘qqa chiqardi va Enfild tribunalarida norozilik hushtaklari yangradi. Bu haqda Goal.com xabar beradi.
Niderlandiyalik mutaxassis jamoaning o‘yin uslubi va natijalari borasida tanqidlarga uchramoqda. Ayniqsa, mavsum davomida jismoniy tayyorgarlik va taktik nazorat borasida muammolarga duch kelayotgan Liverpulning Chelsi kabi inqirozli davrni boshdan kechirayotgan jamoaga qarshi o‘yini muxlislarni xavotirga solmoqda.
Arne Slot joriy mavsumda muxlislarning fikrini o‘zgartirish qiyinligini tan oldi, ammo kelasi mavsum uchun rejalari borligini ta'kidladi. U jamoani qayta qurish va tarkibdagi jarohatlar muammosini hal qilish orqali kelasi yili butunlay boshqacha Liverpulni ko‘rishga 100 foiz ishonch bildirmoqda.
Hozirgi vaqtda murabbiyning asosiy maqsadi Chempionlar ligasi yo‘llanmasini qo‘lga kiritish uchun qolgan o‘yinlarda maksimal ochko jamg‘arishdir. Slot futbolchilarning ikkinchi bo‘limdagi harakatlarini ijobiy baholab, jamoa g‘alaba uchun bor kuchini sarflaganini qo‘shimcha qildi.
“Zamin”ni Telegramʻda oʻqing!
