Liverpul himoyachisi Joe Gomez jamoaning Chelsi bilan kechgan 1:1 hisobidagi durangdan so‘ng o‘z muxlislari tomonidan hushtakbozlik bilan kutib olingani futbolchilarga qattiq ta’sir qilganini tan oldi. Jamoaning eng uzoq vaqt to‘p surayotgan futbolchisi sifatida u muxlislarning hafsalasi pir bo‘lganini tushunishini, biroq bu holat o‘yinchilar uchun ruhiy jihatdan og‘ir ekanini ta’kidladi. Bu haqda Goal.com xabar beradi.
Arne Slot shogirdlari Chempionlar ligasi yo‘llanmasi uchun kurashni davom ettirmoqda va mavsum yakuniga qadar g‘alaba qozonishlari shart. Gomez muxlislarning noroziligini to‘liq tushunishini, jamoa ham o‘z o‘yinidan qoniqmayotganini va vaziyatni o‘nglashga intilayotganini qayd etdi.
Uchrashuv davomida 17 yoshli Rio Ngumohaning zaxiraga olinishi muxlislarning keskin e’tiroziga sabab bo‘lgandi. Biroq Gomez yosh futbolchining jismoniy charchoq sababli almashtirilganini tushuntirib, murabbiy qarorini himoya qildi va Ngumoha kelajakda Liverpulning yorqin yulduziga aylanishiga ishonch bildirdi.
Jamoa ichidagi muhit haqidagi savollarga javob berar ekan, Gomez kiyinish xonasida bo‘linish yuz bergani haqidagi mish-mishlarni rad etdi. Uning so‘zlariga ko‘ra, tajribali futbolchilar yangi kelgan o‘yinchilarga Liverpul kabi klubdagi bosimga moslashishda yordam berish uchun bor kuchlari bilan harakat qilmoqda.
“Zamin”ni Telegramʻda oʻqing!
