Volfsburgga qarshi kechgan bahsda Bavariya hujumchisi Garri Keyn o‘zining Bundesligadagi 24 ta muvaffaqiyatli penaltidan so‘ng ilk bor xatoga yo‘l qo‘ydi. Vaziyatga raqib himoyachisi Jeanuyel Belotsianning penalti nuqtasini oyoqlari bilan ataylab buzib qo‘ygani sabab bo‘lgani taxmin qilinmoqda. Bu haqda Goal.com xabar beradi.
Uchrashuvdan so‘ng ushbu harakat "iflos hiyla"mi yoki o‘yinning bir qismi degan savol qizg‘in muhokamalarga sabab bo‘ldi. Volfsburg futbolchisi Patrikk Vimmer bu kabi usullarni qiyin vaziyatdagi jamoalar uchun odatiy hol deb atadi, ammo Bavariya vakillari bunga keskin munosabat bildirishdi.
Bavariya yosh futbolchisi Tom Bischof bu harakatni nomaqbul deb atab, qanday vaziyat bo‘lishidan qat’i nazar, fair play tamoyillariga amal qilish kerakligini ta’kidladi. Jamoa darvozaboni Jonas Urbig vaziyatga xotirjam yondashgan bo‘lsa-da, bosh murabbiy Vinsent Kompani ikki tomonlama fikr bildirdi.
Vinsent Kompani raqibning bu qilig‘ini ma’qullamasa-da, Volfsburgning jon saqlab qolish uchun kurashayotganini tushunishini aytdi. "Ular shunchaki taslim bo‘lishlari kerakmidi?" deya savol tashladi murabbiy vaziyatga nisbatan vazminlik bilan.
“Zamin”ni Telegramʻda oʻqing!
