Lionel Messi va Rodrigo De Paul shanba kuni bo‘lib o‘tgan bahsda Inter Miami jamoasining Toronto FC ustidan 4:2 hisobidagi g‘alabasiga katta hissa qo‘shishdi. Argentinalik afsona Kanadadagi o‘yinda yana bir tarixiy natijani qayd etib, MLS tarixidagi eng tez 100 ta golli vaziyatda ishtirok etgan futbolchiga aylandi. Messi bu marraga atigi 64 ta o‘yinda erishib, avvalgi rekordchi Sebastian Giovinconing 95 ta o‘yinlik natijasini yangiladi. Bu haqda Goal.com xabar beradi.
Sakkiz karra Oltin to‘p sohibi o‘yin davomida ikkita golli uzatma amalga oshirdi va 75-daqiqada o‘z nomini tabloga yozdirib qo‘ydi. Ushbu ajoyib o‘yin Inter Miami jamoasining Orlando City bilan bo‘lgan omadsiz bahsidan keyin jamoa uchun muhim ruhiy ko‘mak bo‘ldi. Jamoa bosh murabbiyi Guillermo Hoyos argentinalik yulduzning maydondagi harakatlaridan hayratda ekanini yashirmadi.
Hoyos matbuot anjumanida: “Bu g‘ayritabiiy rekord. Menimcha, biz uni yanada ko‘proq himoya qilishimiz kerak. Chunki Leo Messilar ko‘p emas, u yagona”, deya ta’kidladi. Murabbiyning so‘zlariga ko‘ra, Messi va uning jamoadoshlari kabi futbolchilar Shimoliy Amerikada futbolning rivojlanishi uchun asosiy kuch hisoblanadi va ularni asrash kerak.
Uchrashuvda Rodrigo De Paul ham o‘zining yuqori saviyasini namoyish etdi. U jarima zarbasidan so‘ng qaytgan to‘pni darvozaga aniq yo‘llab, hisobni ochdi va jamoasining hujumkor o‘yiniga poydevor qo‘ydi. Hoyos ushbu ikki futbolchini “haqiqiy yulduzlar” deb atab, ularning maydondagi ijodkorligi har qanday himoyani yorib o‘tishga qodirligini alohida qayd etdi.
“Zamin”ni Telegramʻda oʻqing!
