David Alaba va Real Madrid joriy mavsum yakunida xayrlashishi kutilmoqda. Avstriyalik himoyachining shartnomasi yozda oʻz nihoyasiga yetadi va tomonlar uni uzaytirish niyatida emas. Bu haqda Goal.com xabar beradi.
Italiyaning Corriere dello Sport nashri xabariga koʻra, RB Salzburg klubi 33 yoshli futbolchini oʻz safiga qoʻshib olishga qiziqish bildirmoqda. Avstriya jamoasi Alabani yosh futbolchilarga ustozlik qiladigan tajribali yetakchi sifatida koʻrmoqda.
Alaba uchun vataniga qaytish hissiy jihatdan muhim ahamiyatga ega. U oʻz faoliyatini aynan Avstriyada boshlagan va u yerdan Bavariya safiga yoʻl olgan edi. Biroq, futbolchiga faqatgina Salzburg emas, balki boshqa klublar ham qiziqish bildirmoqda.
Transfer boʻyicha insayder Fabrizio Romanoning taʼkidlashicha, Alabaning agenti Pini Zahavi Milan shahrida bir qator klublar bilan muzokaralar olib borgan. Shuningdek, futbolchining MLS yoki Saudiya Arabistoni chempionatiga oʻtish ehtimoli ham koʻrib chiqilmoqda.
Joriy mavsumda jarohatlar sababli Alaba Real Madrid safida atigi 14 ta oʻyinda maydonga tushdi. 2021-yilda Madridga kelgan himoyachi jamoa bilan ikki bor Chempionlar ligasi gʻolibi boʻlishga erishdi.
“Zamin”ni Telegramʻda oʻqing!
