Elye Wahi o‘zining sobiq jamoasi Eintracht Frankfurt faoliyatiga nisbatan keskin fikrlar bildirdi. Fransiyaning L'Equipe nashriga bergan intervyusida 23 yoshli hujumchi Germaniyadagi qiyin davri va klub rahbariyatining munosabati haqida gapirib o‘tdi. Uning so‘zlariga ko‘ra, klubda o‘zini ko‘rsatishi uchun yetarli darajada qo‘llab-quvvatlash va imkoniyat berilmagan. Bu haqda Goal.com xabar beradi.
"Germaniyada men tilni bilmagan holda butunlay yangi dunyoga tushib qoldim. Bir yil ichida atigi to‘rt marta asosiy tarkibda maydonga tushdim. Hatto ismingiz Lionel Messi bo‘lsa ham, o‘z qobiliyatingizni namoyish etish uchun vaqt kerak", — dedi Wahi. Shuningdek, u bosh murabbiy Dino Toppmöllerga nisbatan ham e’tiroz bildirib, unga yetarlicha ishonch bildirilmaganini ta’kidladi.
Wahi 2025-yilning yanvarida 26 million yevro evaziga Eintracht Frankfurt safiga kelib qo‘shilgan edi. Biroq, 12 oy davomida u bor-yo‘g‘i 25 ta o‘yinda maydonga tushib, atigi bitta gol urishga muvaffaq bo‘ldi. Natijada, qishki transfer oynasida klub uni OGC Nice jamoasiga ijaraga berdi.
Hozirda fransuz klubida o‘zini ko‘rsatishga harakat qilayotgan futbolchi 16 ta o‘yinda 7 ta gol urib, 2 ta golli uzatmani amalga oshirdi. Garchi ijara muddati mavsum oxirigacha bo‘lsa-da, Wahi Eintracht Frankfurt tarkibiga qaytishni istamayapti. Klub rahbariyati esa futbolchini 20 million yevrodan boshlanadigan takliflar evaziga sotib yuborishga tayyor.
“Zamin”ni Telegramʻda oʻqing!
