Real Madrid himoyachisi Ferland Mendy o‘ng son qismidagi jarohati sabab Lion shahrida muvaffaqiyatli jarrohlik amaliyotini boshdan kechirdi. Klub tibbiy xizmati nazorati ostida o‘tgan operatsiya futbolchining mavsum davomida qiynagan mushak muammosini bartaraf etishga qaratilgan. Bu haqda Goal.com xabar beradi.
Ispaniya matbuotida Mendyning faoliyatini yakunlashi mumkinligi haqidagi mish-mishlar tarqalgan edi, biroq bu xabarlar rad etildi. Futbolchiga yaqin manbalarning ta’kidlashicha, himoyachi maydonga qaytishga qat’iy bel bog‘lagan va faoliyatini erta yakunlash niyatida emas.
Eslatib o‘tamiz, Ferland Mendy joriy mavsumda bir necha bor jarohatlar bilan to‘qnash keldi. Uning so‘nggi jarohati 3-may kuni Espanyolga qarshi o‘yinda yuz bergan va u atigi 14 daqiqadan so‘ng maydonni tark etishga majbur bo‘lgandi.
Real Madrid rasmiy bayonotiga ko‘ra, operatsiya muvaffaqiyatli o‘tgan va futbolchi yaqin kunlarda reabilitatsiya jarayonini boshlaydi. Klub himoyachining bir necha oydan so‘ng yana safga qaytishini kutmoqda.
“Zamin”ni Telegramʻda oʻqing!
