Angliya Premer-ligasi vakili Nottingem Forest joriy mavsumdagi beqarorlikka qaramay, yozgi transfer oynasida yana bir bor bosh murabbiy almashinuvini amalga oshirishi mumkin. Klub xo‘jayini Evangelos Marinakis Fulxem ustozi Marko Silvani jamoaga olib kelishni maqsad qilgan. Bu haqda Goal.com xabar beradi.
Marinakis va Silva o‘rtasidagi munosabatlar 2016-yilda Olimpiakosdagi muvaffaqiyatli hamkorlik davriga borib taqaladi. O‘sha vaqtda Silva Gretsiya chempionligini qo‘lga kiritib, Yevropa rekordini o‘rnatgan edi. Nottingem Forest rahbariyati aynan shu tajriba va taktik barqarorlik jamoani yangi bosqichga olib chiqishiga ishonmoqda.
Biroq, portugaliyalik mutaxassis uchun kurash oson kechmaydi. Chelsi ham o‘z murabbiylar shtabini kuchaytirish maqsadida Silvani nomzodlar qatoriga qo‘shgan. Shuningdek, Joze Mourinyu Real Madridga qaytishi kutilayotgan bir paytda, Benfika ham o‘ziga yangi bosh murabbiy izlamoqda va Silva ularning ham diqqat markazida.
Nottingem Forest joriy mavsumda allaqachon to‘rt nafar murabbiyni almashtirib ulgurdi. Shunga qaramay, klub xo‘jayini jamoaning Premer-ligadagi o‘rnini mustahkamlash uchun yana bir bor tavakkal qilishga tayyor. Fulxem esa o‘z navbatida muvaffaqiyatli ishlayotgan murabbiyini qo‘yib yuborishni istamayapti.
“Zamin”ni Telegramʻda oʻqing!
