Mavsum yakuniga yaqinlashar ekan, Manuel Neuer yana diqqat markazida. Bavariya sardori o‘z faoliyatini yana bir yilga uzaytirish bo‘yicha klub rahbariyati bilan kelishuvga erishdi. Ma’lumotlarga ko‘ra, tajribali darvozabon maoshining qisqartirilishiga rozi bo‘lgan va shartnoma rasman Bundesliga doirasidagi 1. FC Köln bilan o‘yindan oldin imzolanadi. Bu haqda Goal.com xabar beradi.
Klub faxriy prezidenti Uli Hoeneß ham Neuerning jamoada qolishini qo‘llab-quvvatlagan. Yangi shartnomaga ko‘ra, 22 yoshli Jonas Urbig ikkinchi darvozabon sifatida o‘z o‘rnini saqlab qoladi va Neuer unga ustozlik qilishda davom etadi. Sven Ulreich esa uchinchi darvozabon sifatida jamoada qolishi kutilmoqda.
Neuerning joriy mavsumdagi ishonchli o‘yini muxlislarda uning Germaniya terma jamoasiga qaytishi borasida umid uyg‘otgan edi. Biroq, darvozabon bu boradagi qarori qat’iy ekanligini va terma jamoadagi faoliyatini yakunlaganini yana bir bor ta’kidladi.
Bosh murabbiy Julian Nagelsmann ham Neuerning terma jamoaga qaytishi haqidagi mish-mishlarga nuqta qo‘ydi. Uning so‘zlariga ko‘ra, Manuel o‘z xohishi bilan terma jamoadan ketgan va bu masalani qayta muhokama qilishdan ma’no yo‘q.
“Zamin”ni Telegramʻda oʻqing!
