Kristal Pelas yarim himoyachisi Adam Wharton yozgi transfer oynasida jamoani tark etishi kutilmoqda. Futbolchiga Manchester Yunayted va Liverpul kabi grand klublar jiddiy qiziqish bildirmoqda. Garchi 22 yoshli futbolchining shartnomasi 2029-yilga qadar moʻljallangan boʻlsa-da, klub uni yuqori narx evaziga qoʻyib yuborishga tayyor boʻlishi mumkin. Bu haqda Goal.com xabar beradi.
Klinton Morrisonning fikricha, Konferensiyalar ligasidagi gʻalaba ham Whartonni Londonda ushlab qolish uchun yetarli boʻlmasligi mumkin. Futbolchi oʻz rivojlanishi va Angliya terma jamoasidagi oʻrnini mustahkamlash uchun Chempionlar ligasida ishtirok etadigan jamoaga oʻtishni maqsad qilgan boʻlishi ehtimoli yuqori.
Kristal Pelas rahbariyati futbolchi uchun 60-70 million funt sterling atrofida mablagʻ talab qilishi kutilmoqda. 2024-yilda atigi 18 million funtga xarid qilingan yarim himoyachi uchun bu juda foydali bitim boʻlishi mumkin. Shunga qaramay, klub raisi agar munosib taklif kelib tushmasa, futbolchini sotishga shoshilmaydi.
Adam Wharton oʻtgan vaqt mobaynida Angliya Premer-ligasining yetakchi oʻyinchilaridan biriga aylandi va terma jamoa safida toʻrt marta maydonga tushdi. Uning kelajagi yozgi transfer bozoridagi eng qiziqarli voqealardan biri boʻlishi kutilmoqda.
“Zamin”ni Telegramʻda oʻqing!
