Manchester Siti bosh murabbiyi Pep Guardiola joriy mavsum yakunida klubni tark etishini rasman eʻlon qilganidan soʻng, Saudiya Arabistonining Al-Nassr klubi mutaxassisga qiziqish bildira boshladi. Saudiya Pro-ligasi chempionlari dunyoning eng kuchli murabbiyi va Cristiano Ronaldo oʻrtasida tarixiy hamkorlikni yoʻlga qoʻyishni maqsad qilgan. Bu haqda Goal.com xabar beradi.
Guardiola Manchester Siti safidagi 10 yillik muvaffaqiyatli faoliyatini yakunlashini eʻlon qilishi ortidan, Al-Nassr rahbariyati uni Ar-Riyodga jalb qilish uchun harakatga tushdi. Saudiya chempioni va OFK Chempionlar ligasi 2 gʻolibi boʻlgan Jorge Jesus jamoani tark etgach, klub yangi murabbiy izlashga kirishgan. Xabarlarga koʻra, klub murabbiyga yiliga 130 million yevroga yaqin rekord darajadagi maosh taklif qilgan.
Pep Guardiola agenti Josep Maria Orobitg ushbu mish-mishlarga oydinlik kiritdi. U Saudiya nashrlariga bergan intervyusida: "Bir yarim oy oldin aloqa boʻlgan edi, lekin bu shunchaki muloqot boʻlib, hech qanday yozma taklif yoki majburiyat yoʻq. Shuningdek, aytilganidek katta pullar haqida gap ketmagan", — deb taʻkidladi.
Agentning soʻzlariga koʻra, nafaqat Al-Nassr, balki Saudiya Arabistoni futbol federatsiyasi ham murabbiy bilan bogʻlangan. Biroq, hozircha tomonlar oʻrtasida kelishuv ehtimoli juda past. Orobitg hozirgi bosqichda hech bir tomon Guardiola bilan shartnoma imzolash uchun real imkoniyatga ega emasligini qoʻshimcha qildi.
Pep Guardiola Manchester Siti boshqaruvidagi soʻnggi oʻyinini yakshanba kuni Aston Villa jamoasiga qarshi oʻtkazadi. Shundan soʻng, u City Football Group tizimida global elchi sifatida oʻz faoliyatini davom ettirishi kutilmoqda.
“Zamin”ni Telegramʻda oʻqing!
