Italiya A Seriyasining so‘nggi turi katta dramalar, kutilmagan natijalar va yevrokuboklar uchun keskin kurash bilan yakunlandi. Ayniqsa, Chempionlar ligasi yo‘llanmasi uchun kechgan poyga oxirgi daqiqalargacha intriga saqlab turdi.
38-tur oldidan 3-o‘rinda borayotgan “Milan” o‘z taqdirini o‘zi hal qilish imkoniga ega edi. Ammo “rossonerilar” o‘z maydonida “Kalyari”ga 1:2 hisobida mag‘lub bo‘lib, mavsumning eng og‘ir natijalaridan birini qabul qildi. Bu mag‘lubiyat jamoani birdaniga 6-pog‘onaga tushirib yubordi.
“Milan” bahsni juda yaxshi boshlagandi. 2-daqiqada Salemakers hisobni ochib, mezbonlarga ustunlik taqdim etdi. Biroq “Kalyari” tezda o‘yinga qaytdi. 20-daqiqada Borelli hisobni tenglashtirdi, 57-daqiqada esa Rodriges mehmonlarga g‘alaba keltirgan golni urdi. Shu tariqa, Allegri shogirdlari Chempionlar ligasi emas, Yevropa ligasi bilan kifoyalanadigan bo‘ldi.
“Milan”ning qoqilishi raqiblar uchun katta imkoniyat ochdi. “Roma” va “Komo” bu vaziyatdan maksimal darajada foydalandi. Rimliklar safarda “Verona”ni 2:0 hisobida mag‘lub etib, 73 ochko bilan 3-o‘rinni egalladi. Uchrashuvda Malen va El Shaaravi gol urishga muvaffaq bo‘ldi. Qizig‘i, Malen penaltidan foydalana olmagan bo‘lsa-da, keyinchalik baribir o‘z nomini tabloga yozdirdi.
“Komo” esa “Kremoneze” maydonida 4:1 hisobida yirik g‘alaba qozonib, tarixiy natijaga erishdi. Rodriges, Duvikas va Da Kunyaning samarali harakatlari jamoaga kerakli g‘alabani olib keldi. Da Kunya ikkinchi bo‘limda ikki bor raqib darvozasini ishg‘ol qilib, uchrashuv qahramonlaridan biriga aylandi. Shu tariqa, “Komo” 71 ochko bilan 4-o‘rinni egallab, Chempionlar ligasi yo‘llanmasini qo‘lga kiritdi.
Avvalroq chempion “Inter” va vitse-chempion “Napoli” YECHL yo‘llanmasini naqd qilib qo‘ygan edi. Endi ular qatoriga “Roma” va “Komo” ham qo‘shildi. Bu natija, ayniqsa, “Komo” uchun haqiqiy tarixiy voqea sifatida baholanadi.
“Yuventus” ham 71 ochko jamg‘arishi mumkin bo‘lsa-da, o‘zaro o‘yinlarda “Komo”ga imkoniyatni boy bergani sabab Chempionlar ligasiga chiqa olmaydi. Turinliklar kelasi mavsum Yevropa ligasida ishtirok etadi.
Quyi pog‘onada ham mavsum dramatik yakunlandi. “Kremoneze” o‘z maydonida “Komo”dan 1:4 hisobida mag‘lub bo‘lib, B Seriyaga tushib ketdi. Shu tariqa, “Piza” va “Verona”dan keyin elitani tark etgan uchinchi jamoa nomi ham ma’lum bo‘ldi. “Lechche” esa “Jenoa”ni 1:0 hisobida yengib, mavsumni g‘alaba bilan yakunladi.
A Seriya. 38-tur. 24 may
“Milan” — “Kalyari” 1:2
Gollar: Salemakers 2 — Borelli 20, Rodriges 57.“Verona” — “Roma” 0:2
Gollar: Malen 56, El Shaaravi 90+3.
Foydalanilmagan penalti: Malen 56.
Chetlatish: Valentini 50.“Kremoneze” — “Komo” 1:4
Gollar: Bonatssoli 55 penalti — Rodriges 36, Duvikas 51, Da Kunya 74 penalti, 81.
Chetlatish: Grassi 71.“Lechche” — “Jenoa” 1:0
Gol: Banda 6.
Qisqasi, A Seriya so‘nggi turi haqiqiy futbol dramasiga aylandi. “Milan” o‘z uyida yutqazib, Chempionlar ligasidan quruq qoldi. “Roma” va “Komo” esa imkoniyatni mahkam ushlab, Yevropa elitasiga yo‘l oldi. Italiyada mavsum tugadi, ammo bu turning shovqini hali ancha muhokama qilinadi.
“Zamin”ni Telegramʻda oʻqing!
