Poytaxtimizdagi “Humo arena” majmuasida professional boks oqshomi davom etmoqda. Turnir doirasida o‘zbekistonlik istiqbolli charm qo‘lqop ustasi Shohjahon Abdullayev ham ringga ko‘tarildi.
23 yoshli hamyurtimiz 6 raundga mo‘ljallangan bahsda Gana vakili Stefan Akonga qarshi jang qildi. Abdullayev uchrashuv davomida tashabbusni o‘z qo‘lida ushlab, raqibiga bosim o‘tkazdi va to‘rtinchi raundda hal qiluvchi zarbalar orqali jangni muddatidan oldin yakunladi.
Shohjahon Abdullayev ganalik raqibini nokautga uchratib, professional ringdagi g‘alabali yurishini davom ettirdi. Bu uning prof boksdagi yettinchi jangida qo‘lga kiritgan yettinchi g‘alabasi bo‘ldi.
Abdullayevning navbatdagi ishonchli g‘alabasi o‘zbek boksi muxlislari uchun yana bir yoqimli xabar bo‘ldi. U har bir jangda tajriba to‘plab, katta sahnalarga tayyor ekanini ko‘rsatmoqda.
Qisqasi, Shohjahon Abdullayev “Humo arena”dagi prof boks oqshomida Stefan Akonni to‘rtinchi raundda nokautga uchratdi. 7 ta jang, 7 ta g‘alaba — temp yaxshi, yo‘nalish esa katta maqsadlar tomon.
“Zamin”ni Telegramʻda oʻqing!
