O‘zbekiston Futbol Federatsiyasining yangi rahbariyati mamlakatda futbolni tubdan isloh qilishning yangi rejalarini ishlab chiqmoqda. Federatsiya prezidenti Umid Ahmadjonov boshchiligidagi ishchi guruhi 2018-2022 yillarga mo‘ljallangan rivojlantirish dasturini ishlab chiqish asnosida futbolni ko‘tarib turadigan to‘rtta asosiy tamoyilga e’tiborni kuchaytiradi.
O‘zbekiston Futbol Federatsiyasining 12 sentyabr kuni bo‘lib o‘tgan hisobot-saylov konferensiyasida tashkilotga yangi prezident etib saylangan Umid Ahmadjonov mamlakat futbolini birgalikda ko‘tarishiga umid bildirgan edi:
“Ishonchingiz uchun minnatdorchilik bildiraman. Xudo xohlasa keyingi xalqaro musobaqalarda va Olimpiya o‘yinlarida birgalikda, maslahatlashgan holda, o‘zbek futbolini ko‘tarishga va’da beraman. Bundan buyon muhtaram Prezidentimiz Shavkat Miromonovich Mirziyoyev va xalqimizni xursand qilib, futbolimizni birgalikda ko‘taramiz degan umiddaman”.
O‘FF Prezidentining futbolni ko‘tarish haqidagi nutqida futbolni rivojlantirishning 4ta ustunini ko‘rish mumkin.
Birinchi ustun bu musobaqalar bo‘lib, O‘FF bayrog‘i ostidagi musobaqalar o‘tkazilishi saviyasini OFK standartlari holatiga olib kelish, terma jamoalarning xalqaro musobaqalardagi ishtirokini yangi bosqichga olib chiqish birlamchi vazifa qilib qo‘yiladi.
Ikkinchi ustun texnikaviy rivojlantirish masalalari bo‘lib, unga bolalar va o‘smirlar, ommaviy futbol, ayollar futboli, futzal va plyaj futbolini rivojlantirish, murabbiylarni tayyorlash va ularning malakasini oshirish kabi vazifalar kiradi.
Uchinchi ustun PFL va hududiy federatsiyalar faoliyatini kuchaytirish. Unda asosiy e’tibor, futbol bo‘yicha O‘zbekiston chempionati va birinchiligi musobaqalarini o‘tkazish tizimini tubdan isloh qilish, O‘FFning a’zolari hisoblangan 14ta hududiy federatsiyaning mamlakat futbolini rivojlantirishdagi roli va daxldorligini oshirishga qaratiladi.
To‘rtinchi ustun esa, xalqaro munosabatlar bo‘lib, bu jabhada asosan FIFA, OFK, UYeFA va boshqa konfederatsiyalar, hududiy federatsiyalar, milliy federatsiyalar bilan o‘zaro hamkorlik va hamjihatlik aloqalarini kuchaytirish, muvaffaqiyatli sinovdan o‘tgan xalqaro tajribalarni o‘zlashtirish masalalariga e’tibor qaratiladi.
Federatsiyaning yangi rahbariyati ushbu 4 ustunga eltadigan zinapoyalardagi boshqa sohalarni ham takomillashtirish yo‘lidan boradi. Bu hakamlar, jamoatchilik bilan aloqalar, moliya, yuridik va xizmat ko‘rsatish masalalari kabi uzviy bog‘liq sohalardir.
BUGUNGI KUNDAGI USTUVOR MASALALAR
Federatsiyaning yangi rahbariyati oldida zudlik bilan hal qilinadigan 5ta ustuvor masala bor.
Birinchisi, O‘zbekiston milliy terma jamoasining yangi bosh murabbiyini tayinlashdir. Ayni paytda yangi rahbariyat milliy terma jamoaga bosh murabbiy tayinlashda faqat xorijlik murabbiylar nomzodini ko‘rib chiqayotganligini ma’lum qilamiz.
Ikkinchisi, kelishilgan o‘yinlarga qarshi kurashishni yangi bosqichga olib chiqishdir. O‘FF strukturasida futboldagi korrupsiyani oldini olish uchun ma’sul bo‘lgan maxsus bo‘linma, shuningdek, kelishilgan o‘yinlarga qarshi kurashish bo‘yicha bo‘lim va yangi qo‘mita ish boshlaydi. Bu bo‘linma va qo‘mita faoliyatini O‘FF Prezidenti shaxsan nazorat ostiga oladi.
Uchinchisi, bolalar va o‘smirlar futbolini qing‘irliklardan tozalash bo‘lib, yoshlarning futbol maktablari va klublariga joylashishida, shuningdek, mashg‘ulotlar jarayonida mahalliychilik va urug‘-aymoqchilikka yo‘l qo‘yilmasligi va sport prinsiplarining birlamchi bo‘lishini ta’minlashga qaratiladi. Bundan tashqari, futbolchilarning yoshlarini soxtalashtirish kabi illatga qarshi kurashish bo‘yicha ham yangi chora-tadbirlar belgilab olinadi. Federatsiyaning “Har bir bolaga bittadan to‘p” nomli yangi rivojlantirish dasturi ishga tushiriladi.
To‘rtinchisi,federatsiya ishining shaffofligini ta’minlash va shu orqali fuqarolarning federatsiyaga ishonchini ortishiga erishishdir. Aksariyat murojaatlarda federatsiya xalqning mablag‘ini suiste’mol qilganlikda ayblanadi. Fuqarolarda paydo bo‘lgan noto‘g‘ri tasavvurni yo‘qotish uchun federatsiya moliyalashtirish uchun mablag‘ni qayerdan olib, qayerga sarflashini shaffoflashtirishni ta’minlaydi.
Beshinchisi, terma jamoalar, chempionat, kubok va birinchilik o‘yinlariga elektron chiptalar savdosini yo‘lga qo‘yish orqali ishqibozlar chiptalarni o‘z narxida va teng taqsimlash tizimini yo‘lga qo‘yishdir. Bu bilan chiptalar savdosiga chayqovchilarning ta’sirini kamaytirish, hududlardagi ishqibozlarning o‘z uylaridan turib o‘yinlarga chipta sotib olishini ta’minlash kabi qulayliklarni yaratish asosiy maqsad qilib olingan.
O‘FF Prezidenti Umid Ahmadjonov ushbu haftada FIFA prezidenti Janni Infantino bilan uchrashadi. Keyingi haftada esa O‘FFda amalga oshirilishi kutilayotgan islohotlar yuzasidan futbol jamoatchiligiga axborot beriladi.
Manba: Kun.uz / O‘FF Matbuot xizmati “Zamin” yangiliklarini “Youtube”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Raqobat qo‘mitasi birjada Ai-80 benzini boshlang‘ich narxiga cheklov o‘rnatdi
Shavkat Mirziyoyev: “Falastinlik bolalar va ayollarni beg‘araz davolashga tayyormiz”
Borrel YEIning Isroil bilan muloqotini to‘xtatishni taklif qildi
NATO bosh kotibi Ukrainaning frontdagi ahvoli yomonlashganini tan oldi
Erdo‘g‘on Turkiya Isroil bilan aloqalarini uzganini ma’lum qildi
Blinken Isroildan uchta muammoni hal etishni talab qildi
Har qanday katta yoshdagi kishi yetuk emas
Qatarga qarshi qilish kerak bo‘lgan ishni qilmadik!
