Indoneziyada davom etayotgan Paraosiyo oʻyinlarining navbatdagi kun bahslarida Oʻzbekiston sharafini himoya qilgan 10 nafar sportchi shohsupaga koʻtarildi. Sovrindorlar sportning ikki turida – yengil atletika va suzish bahslarida beshtadan medalni umumiy jamgʻarmaga qoʻshib qoʻyishdi.
Yengil atletika
Uzunlikka sakrash bahslarida Asila Mirzayorova bronza medal sohibasi boʻldi. 19 yoshli atlet ikkinchi oʻrinni olgan yaponiyalik sportchidan 1 sm.ga ortda qoldi.
Disk uloqtirishda Elbek Sultonov bronza medaliga sazovor boʻldi. Eslatib oʻtamiz, u avvalroq yadro uloqtirishda oltin olishning uddasidan chiqqan edi.
1500 metrga yugurish bahslarida Maʼrufjon Murodillayev barcha raqiblarini ortda qoldirib, shohsupaning eng yuqori pogʻonasidan joy oldi. U toʻrt yil avval Incheonda oʻtkazilgan Paraosiyo oʻyinlarida ham shu yoʻnalishda gʻolib chiqqan edi.
Kechga yaqin uzunlikka sakrashda yana bir medal qoʻlga kiritildi. Bu safar Sabina Suxanova musobaqadagi ilk kumush medaliga erishdi. Oʻtgan kunlar davomida u 3 karra bronza medal sohibasi boʻlgan edi.
Yengil atletikada Oʻzbekiston uchun kunning soʻnggi medali Fahriddin Hamroyevga nasib etdi. U 5000 metrga yugurishda marra chizigʻini ikkinchi boʻlib kesib oʻtdi va delegatsiya jamgʻarmasini yana bir kumush medal bilan boyitdi.
Suzish
50 metrga erkin usulda suzish bahslarida ikkita oltin medal qoʻlga kiritildi: S12 yoʻnalishida Dmitriy Xorlin, S13da Islom Aslanov chempionlikka erishdi. Shuningdek, S13 yoʻnalishida Aslanovdan keyin marraga yetib kelgan Muzaffar Tursunxoʻjayev kumush medal bilan taqdirlandi.
Bugun Xorlin ham, Aslanov ham musobaqada 5-marta sovrindor safidan joy oldi.
Ayollar oʻrtasidagi musobaqalarning yaqqol favoritlari – Fotima Omilova va Shohsanamxon Toshpoʻlatova bugun ham shohsupadan joy olishdi. 50 metrga erkin usulda suzishda Omilova oltin, Toshpoʻlatova kumush medalni oʻziniki qildi.
Eʼtiborlisi, Shohsanamxon va Fotima musobaqada oʻzlari ishtirok etgan 7 ta yoʻnalishdagi bahslarning barchasida shohsupaga koʻtarilishdi. Bu ikki atlet birgalikda 7 ta oltin, 6 ta kumush, 1 ta bronza bilan umumiy jamgʻarmaga salmoqli hissa qoʻshdi.
Shu tariqa, Oʻzbekiston delegatsiyasi musobaqaning 6-kunida 4 ta oltin, 4 ta kumush va 2 ta bronza qoʻlga kiritib, jami medallar sonini 77 taga yetkazdi. Bu sovrinlarning qariyb yarmi eng yuqori qiymatga ega: 35 ta oltin, 24 ta kumush va 18 ta bronza. Bu natija bilan Oʻzbekiston turnirni, xuddi Osiyo oʻyinlarida boʻlgani kabi, 5-oʻrin bilan yakunlamoqda.
Ertaga, 13 oktyabrda toʻrtta sport turida musobaqalar yakunlangach, uchinchi marta tashkil etilgan Paraosiyo oʻyinlarining yopilish marosimi boʻlib oʻtadi.
“Zamin” yangiliklarini “Twitter”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Samarqandda haydovchidan pora so‘ragan YPX xodimlari ishdan bo‘shatildi
Pentagon Ukraina yuzasidan kutilmagan muammoga duch keldi
Joze Mourino Yevro—2024 favoritlarini sanab o‘tdi
Hokimlik xodimi firibgarlik ortidan qo‘lga tushdi
AQSH Rossiyaga qarshi yangi sanksiyalar kiritdi
Yashirin iqtisodiyot bo‘yicha qaror loyihasi Tadbirkorlik kengashi takliflari asosida qayta ko‘rib chiqiladi
Jasur Jaloliddinov: "Finalda kuchli jamoa yutqazdi"
Germaniyada Rheinmetall qurol kompaniyasi rahbarining dachasi yoqib yuborildi