Pro liga ishtirokchisi bo‘lgan Toshkentning "Oq-tepa" klubi yangi mavsum oldidan tarkibini bir qator yangi futbolchilar hisobiga to‘ldirib oldi. Kuni kecha jamoaga yana bir braziliyalik hujumchi Gilerme Da Silva kelib qo‘shildi. Bunga qadar "Gremio", "Atletiko Mineyro", "Saxam" (Ummon) kabi klublarda to‘p tepgan 29 yoshlik forvard saytimizga dastlabki taassurotlari, o‘zbek futboli haqidagi fikrlarini bildirib o‘tdi.
"O‘zbekistonga kelishim juda ham tezda yuz berdi. "Oq-tepa" taklifini qabul qilganimdan maqsad sovrinlarga ega chiqish. Qaysidir ma’noda bu men uchun ham yangi chaqiruv bo‘ldi, deya olaman. Jamoaga hozirda sekin-asta moslashmoqdaman. Umumiy xulosa chiqarishga hali erta. Bir nechta o‘yinlarda ishtirok etib biror fikrga kelish mumkin. Umid qilamanki hammasi ko‘ngildagidek bo‘ladi.
Menga bu yerda o‘z vaqtida Rivaldo, Denilson, Luizao kabi yulduzlar to‘p tepishganini aytishganda ochig‘i hayron qoldim va o‘zim ham internet orqali bu borada ma’lumotlar to‘pladim. Shuningdek Ummon chempionati vakili bo‘lgan "Saxam" klubida o‘zbekistonlik himoyachi Maksimiliyan Fomin bilan birga to‘p tepganman. Undan o‘zbek futboli haqida ko‘p eshitganman. Klub taklif qilgan loyiha menga yoqdi.
Hozirga qadar katta jamoalarda o‘ynab ko‘plab sovrinlarga ega chiqqanman. Faoliyatimni bir joyda to‘xtatib qo‘yish niyatim yo‘q. Shuning uchun "Oq-tepa"da yanada yaxshiroq to‘p tepishim zarur. Balki shu orqali terma jamoaga ham chaqirilishim mumkin.
Braziliyalik legionerlardan O‘zbekistondan boshqa mamlakatlarda ham ko‘p narsalar kutishadi. Bosim katta bo‘lishini bilaman. Men bunga tayyorman. O‘z o‘yinimni ko‘rsatishga harakat qilaman", - deydi futbolchi.
Abdulaziz Iskandarov
“Zamin”ni Telegramʻda oʻqing! 
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
