Katanes Ermatovga hisobot berdi yoxud O‘FAda terma jamoaning kelajak rejalari muhokama qilindi

O‘FA birinchi vitse-prezidenti Ravshan Ermatov milliy terma jamoamiz murabbiylar shtabi bilan uchrashdi. Bu haqda O‘FA matbuot xizmati xabar tarqatmoqda.

Uchrashuvda dastlab terma jamoa bosh murabbiyi Srechko Katanes Gruziyada o‘tgan yig‘in natijalari hamda O‘zbekistondagi faoliyatining dastlabki qismi borasida hisobot taqdim etdi. Shundan so‘ng milliy jamoaning keyingi yilgi rejalari muhokama etildi. Xususan, sloveniyalik mutaxassis tayyorgarlikni yanvar oyidan boshlashi va mavsumlar oralig‘ida bir necha nazorat uchrashuv o‘tkazishni reja qilayotganini ma’lum qildi.

O‘z navbatida Ravshan Ermatov kuchli raqiblarga qarshi o‘rtoqlik uchrashuvlari amaliyotini davom ettirish borasida O‘FA tomonidan barcha ishlar qilinishi, yurtimizda umidli, iste’dodli futbolchilar ko‘pligini inobatga olgan holda, seleksiya ishlarini doimiy tarzda amalga oshirish zarurligi, ayniqsa yoshlarga e’tiborni oshirish va barcha futbolchilar milliy jamoada o‘ynash uchun bir xil imkoniyatga ega bo‘lishi kerakligini ta’kidlab o‘tdi.

Terma jamoamizning 2022 yildagi to‘liq taqvimi, o‘yinlarning ehtimoliy sanalari, yig‘in kunlari batafsil ishlab chiqildi. Shuningdek, bugungi kun talabidan kelib chiqib, futbolchilarning tibbiy tekshiruvlarini yanada chuqurlashtirilgan tartibda o‘tkazishga kelishildi. “Zamin” yangiliklarini “Youtube”da kuzatib boring