Anxel Lopes: "Termizdagi stadionda rekonstruktsiya ishlari yakunlangach, muxlislarimiz qarshisida oʻynashimiz mumkin"

Superliganing 2-turidan oʻrin olgan "Surxon" – "Navbahor" (1:2) uchrashuvidan soʻng mezbonlar bosh murabbiyi Anxel Lopes fikrlarini bildirdi.
"Birinchi va ikkinchi boʻlimda koʻplab vaziyatlar yaratdik. Gol oʻtkazib yuborganimizga qaramasdan, maydonning ikkinchi yarmida faol harakat qildik. Yigitlar bilan faxrlanaman. Ular maksimal harakat qilishdi", – deydi Anxel Lopes.

- Bugungi raqibingiz – "Navbahor" jamoasi haqida fikringiz qanday?
- "Navbahor" Oʻzbekistonda juda kuchli tarkibga ega jamoalardan biri hisoblanadi. Hujumda keskinliklar hosil qilishdi. Bizda mavsum oldidan tayyorgarlik uchun vaqt kam edi. Qadam va qadam oldinga intilib boramiz.

- Oldingizga qoʻyilgan maqsad va vazifalar nimalardan iborat?
- Maqsadimiz – Superligada qolgan jamoalarga qarshilik koʻrsatish va munosib ishtirok etish. Bosqichma-bosqich yuqoriga intilib boramiz.

- Oʻzbekiston Superligasining ilk turidan soʻng qanday xulosalar chiqardingiz?
- Men koʻplab chempionatlarni koʻrganman. Oʻzbekiston Superligasi kuchsiz emas. Klublar oʻziga yarasha kuchli. Termizda oʻynashni istardik. U erda koʻplab muxlislarimiz bor. Oʻylaymanki, stadionimizdagi rekonstruktsiya ishlari yakunlangach, ishqibozlarimiz koʻz oʻngida toʻp tepamiz. “Zamin” yangiliklarini “Telegram”da kuzatib boring