Krishtianu Ronaldu futbol tarixidagi eng yaxshi toʻpurarga aylandi

«Manchester Yunayted» hujumchisi Krishtianu Ronaldu Premer Liga 29-turi doirasida «Tottenhem»ga qarshi kechgan bahsda (3:2) het-trik muallifiga aylandi.

Ronaldu klub va terma jamoa miqyosidagi rasmiy gollari sonini 807 taga etkazib oldi. Bu futbol tarixidagi eng yaxshi koʻrsatkich. Rec.Sport.Soccer Statistics Foundation (RSSSF) hisob-kitoblariga koʻra, Ronaldu Yozef Bitsanning (805 ta gol) rekordini yangilagan.

Ta'kidlash joiz, Bitsan, Pele va oʻtmishning boshqa futbolchilari urgan gollar soni turli manbalarda turlicha berilgan. Ishonchli manbalar orasida RSSSF’da Bitsan koʻrsatkichi yuqoriroq edi. Avvalroq boshqa manbalar Ronalduni futbol tarixidagi eng yaxshi toʻpurar sifatida e'tirof etgandi.

Bu portugaliyalik futbolchi uchun faoliyatidagi 59-het-trik boʻldi. Ayni vaqtda faoliyatini davom ettirayotgan oʻyinchilar orasida faqat Messi (55) unga yaqin bormoqda.

Shuningdek, Ronaldu (37 yosh-u 35 kun) APLda het-trikka erishgan Teddi Sheringemdan (37 yosh-u 146 kun) keyingi eng yoshi katta futbolchiga aylandi.

Ronaldu Premer Liga joriy mavsumida 24 ta oʻyin oʻtkazib, 12 ta gol va uchta golli uzatma muallifiga aylandi. Futbolchi qatorasiga 16 mavsumdan beri chempionat doirasida 10+ gol urmoqda. “Zamin” yangiliklarini “Telegram”da kuzatib boring