Oʻzbekiston va rossiyalik olimlar koʻcha zoʻravonligini aniqlovchi neyron tarmoq yaratdi

^{Foto: TASS}
Oʻzbekiston va Rossiya tadqiqotchilari jamoasi videokuzatuv kameralari ma'lumotlaridan foydalangan holda koʻchadagi zoʻravonlik harakatlarini avtomatik aniqlay oladigan neyron tarmoqni ishlab chiqdi. Bu haqda tadqiqot olib borilgan Janubiy Ural davlat universitetiga (JUDU) tayanib, “TASS” xabar berdi.

Mutaxassislarning aytishicha, koʻcha videonazorat kameralari juda katta hajmdagi ma'lumotlar oqimini uzatadi. Natijada, mavjud neyron tarmoqlariga haddan tashqari bosim yuklanadi, chunki ular asosan binolar ichidagi kameralarga moslab ishlab chiqilgan. JUDU dotsenti Veronika Denisovich tataristonlik va oʻzbekistonlik hamkasblari bilan birgalikda yangi neyron tarmogʻini yaratishda koʻp ma'noli mantiqni qoʻlladi, bu esa ortiqcha yuklanish muammosini muvaffaqiyatli hal qilishga imkon berdi, deyiladi xabarda.

Ma'lumotlarga koʻra, neyron tarmogʻi koʻcha kuzatuv kameralari qayd etgan zoʻravonlik holatlarining 98 foizdan koʻprogʻini aniqlay oladi.

Ishlab chiquvchilarning ta'kidlashicha, ushbu texnologiya shaharlarda xavfsizlikni oshirishga yoʻnaltirilgan boʻlib, “Aqlli shahar” tizimining tarkibiy qismiga aylanishi mumkin. JUDU mutaxassislari texnologiyani yanada samaraliroq videokuzatuv tizimlarini yaratishda qoʻllash mumkinligini aytdi. “Zamin” yangiliklarini “Telegram”da kuzatib boring