Finlyandiyaning afsonaviy brendlaridan biri bo‘lmish Nokia joriy yil boshida smartfon ishlab chiqarishni to‘xtatganini e’lon qilgandi. Oradan yetti oy o‘tib, kompaniya yangicha yondashuv va yangi rejalar bilan bozorga qaytishini ma’lum qildi, deb xabar berdi Android Authority.
Bu galgi qaytish odatdagidek emas — Nokia o‘z brendini yakka o‘zi emas, balki ishonchli va tajribali hamkor bilan tiklashni rejalashtirmoqda. Rasmiy manbalarga ko‘ra, kompaniya ayni paytda global miqyosda mobil qurilmalarni birgalikda yaratish va tarqatishga tayyor ishlab chiqaruvchi qidirmoqda.
Oxirgi yillarda Nokia smartfonlari HMD Global bilan tuzilgan litsenziya kelishuvi orqali bozorda paydo bo‘lgandi. Bu shartnoma 2026 yilda tugaydi, ammo turli tahlillarga ko‘ra, uni uzaytirish ehtimoli juda kam.
Ayni damda HMD o‘z brendi ostidagi qurilmalarni ishlab chiqarishga allaqachon kirishib bo‘lgan. Bu holat Nokia bilan bo‘lgan munosabatlarning asta-sekin yakun topayotganidan darak beradi. Ya’ni, Nokia endi o‘z yo‘lini yangi hamkorlar bilan boshlashga qaror qilgan.
Texnologik tahlilchilarning fikriga ko‘ra, bugungi kun yosh avlodi uchun Nokia nomi avvalgi qiymatni ifodalamaydi. Qayta tanilish oson bo‘lmaydi, chunki raqobat kuchli, auditoriya esa talabchan. Nokia singari tarixiy brendning zamonaviy bozorda qayta o‘rin egallashi uchun nafaqat kreativ yondashuv, balki zamon talabiga javob beradigan qurilmalar va to‘g‘ri pozitsiyalash kerak bo‘ladi.
Agar kompaniya sifatli hamkor topsa va yangi smartfonlar haqiqatan ham funksional va estetik jihatdan bozor talablariga javob bersa, bu so‘nggi qaytish emas, balki navbatdagi rivojlanish bo‘lishi mumkin. Aks holda, bu harakat ramziy harakatdan o‘ta olmasligi mumkin.
Eslatib o‘tamiz, 2025 yilning yanvar oyida Nokia o‘z brendi ostida smartfon chiqarishni to‘xtatganini rasman e’lon qilgandi. Bu qaror ortida Apple va Samsung singari gigantlar bilan raqobatlashishda qiyinchiliklar bo‘lgani aytilgan.
Endi esa, vaqt ko‘rsatadi — Nokia haqiqatan ham katta bozorga qayta oladimi yoki tarixdagi bir sahifa bo‘lib qoladimi. Ammo bir narsa aniq: bu harakat muxlislarda qiziqish uyg‘otdi va butun dunyo brendning keyingi qadamini kuzatyapti.
“Zamin”ni Telegramʻda oʻqing!
