Elektronika dunyosida o‘zgacha dizayn bilan ajralib turadigan Lofree brendi yana yangilik bilan chiqdi. Kompaniya ayollar uchun mo‘ljallangan, ko‘rinishi kosmetika vitrinasini eslatuvchi Lipstick nomli klaviaturani taqdim etdi.
Bu klaviaturaning eng birinchi jihati — uning ranglariga bog‘liq. Tugmalari turli xil pomada soyalarida tayyorlangan: qizil, to‘q pushti, norinj, yumshoq bej va yana bir necha rang variantlari bilan bezatilgan. Yarim shaffof korpus esa unga nafosatli va zamonaviy ko‘rinish bag‘ishlaydi.
Ajoyib dizayn elementlaridan biri — Escape tugmasi. U miniatyura pomada shaklida ishlab chiqilgan bo‘lib, klaviaturaga ayniqsa ayollarga mos estetik joziba qo‘shadi.
Lofree Lipstick ixcham konstruksiyada bo‘lib, 84 ta tugmadan iborat. Shu bilan birga, barcha muhim boshqaruv elementlari — yo‘naltirish, ovoz va multimedia tugmalari joy olgan. Qurilma Windows, macOS, iOS va Android tizimlari bilan to‘liq mos keladi.
Qulaylik uchun klaviatura uch xil usulda ulanadi:
• USB-C kabeli orqali;
• Bluetooth orqali;
• 2.4 GHz wireless ulanish orqali.
Simsiz rejimida u 1000 Hz chastotada ishlaydi, bu esa uni nafaqat ofisda, balki o‘yin paytida ham tezkor va barqaror foydalanish imkonini beradi.
Hot-swap tizimi tufayli har bir tugmani xohlagan vaqtda oson almashtirish mumkin. Ichki tuzilishi esa tovushni yumshatadi — yozish paytida klaviatura juda yoqimli va deyarli sokin tovush chiqaradi.
Lofree brendi shu uslubdagi kalkulyatorni ham taqdim etdi. Unda 20 ta tugma va yorug‘ LED ekran mavjud bo‘lib, u mustaqil qurilma sifatida ishlaydi va dizaynerlik jihatdan klaviatura bilan uyg‘unlik yaratadi.
Narxlar ham ma’lum: klaviaturaning bahosi taxminan 160 dollar atrofida, kalkulyatorniki esa 79 dollardan boshlanadi.
Tahlilchilar fikricha, Lofree Lipstick nafaqat ish uchun qulay qurilma, balki ish stoli uchun estetik jihatdan bezak bo‘la oladigan aksessuar ham hisoblanadi.
“Zamin”ni Telegramʻda oʻqing!
