Apple arzonroq MacBook chiqaradi

Apple kompaniyasi arzonroq narxdagi MacBook ishlab chiqarmoqda. Bu haqda Bloomberg axborot agentligi xabar berdi.

Ichki kod nomi J700 bo‘lgan ushbu qurilma keng foydalanuvchilar auditoriyasi uchun mo‘ljallangan bo‘lib, oddiy vazifalarni bajarishga qaratilgan. U internet sahifalarini ko‘rish, ofis hujjatlari bilan ishlash, oddiy multimedia tahrirlash va boshqa katta resurs talab qilmaydigan vazifalar uchun ideal tanlov bo‘ladi.

Insayderlarning ma’lumotlariga ko‘ra, qurilma faol sinov bosqichida bo‘lib, xorijiy yetkazib beruvchilar tomonidan dastlabki ishlab chiqarish bosqichiga o‘tgan. Apple ushbu arzonroq MacBook’ni 2026 yilning birinchi yarmida chiqarishni rejalashtirmoqda.

Narxni pasaytirish va agressiv narx siyosatini amalga oshirish maqsadida Apple o‘zining avvalgi MacBook modellarida qo‘llanilmagan bir qator muhandislik yechimlarini joriy qiladi. Bloomberg analitigi Mark Gurmanning ta’kidlashicha, qurilma nisbatan arzonroq komponentlar, jumladan, yuqori sifatli modellarga nisbatan pastroq LCD displey bilan jihozlanadi.

Ushbu MacBook’ning ekrani hozirgi MacBook Air’ning 13,6 dyuymli ekranidan kichikroq bo‘ladi. Muhim jihat shundaki, qurilma uchun iPhone uchun ishlab chiqilgan protsessor (ehtimol, A18 Pro chipi) ishlatiladi.

Bu Macbook tarixida ilk bor maxsus Mac kompyuterlari uchun mo‘ljallangan M seriyasidagi chip o‘rniga mobil protsessor qo‘llanishini anglatadi. Bloomberg’ning qayd etishicha, ichki sinovlar iPhone chipi bir necha yil avval MacBook’larda ishlatilgan M1 chipiga qaraganda yaxshiroq ishlashini ko‘rsatgan.

Apple ilgari iPad uchun iPhone chiplarini qo‘llagan, ammo keyinchalik yuqori darajadagi modellarda M seriyasidagi protsessorlarga o‘tgan edi. Yangi MacBook’ning narxi ming dollardan sezilarli darajada arzon bo‘lishi kutilmoqda.

Qurilma taxminan 600 dollar atrofida bo‘ladi va bu uni Magic Keyboard Folio klaviaturasiga ega yuqori sifatli iPad planshetlari, shuningdek, ChromeOS tizimida ishlaydigan arzon noutbuklar (Chromebook) bilan raqobatlashishga imkon beradi. Tarixiy jihatdan Apple doimo yuqori foyda marjasi bilan premium segmentga e’tibor qaratgan.

J700 modeli bilan arzonroq noutbuklar bozoriga kirish kompaniya uchun yangi qadam bo‘ladi. “Zamin”ni Telegramʻda oʻqing!