Apple o‘zining yangi va nisbatan hamyonbop smartfoni — iPhone 17e modelini rasman taqdim etdi. Kompaniya bu qurilmani keng omma uchun mos, zamonaviy texnologiyalar jamlangan va kundalik foydalanishda qulay yechim sifatida namoyon qildi. Eng qizig‘i, ushbu model iPhone 17 oilasi ichida eng arzon variant sifatida maydonga chiqdi, ammo “arzon” degani bu safar imkoniyatlar qisqarganini anglatmayapti. Aksincha, Apple bu qurilmada narx va imkoniyatlar o‘rtasida ancha o‘ylangan muvozanatni ushlab qolishga uringan.
Yangi iPhone 17e’ning boshlang‘ich narxi 599 dollar etib belgilandi. Bu esa uni 2026 yilgi Apple smartfonlari qatorida eng maqbul narxdagi modelga aylantirdi. Shu bilan birga, bazaviy versiya endi 256 GB ichki xotira bilan taklif etilmoqda. Bu avvalgi avloddagi kirish darajasidagi xotira hajmiga nisbatan ikki baravar ko‘p degani. Oddiy aytganda, foydalanuvchiga endi surat, video, ilovalar va o‘yinlar uchun ancha kengroq joy berilyapti.
Qurilma 6,1 dyuymli displey bilan jihozlangan bo‘lib, Apple auditoriyasi uchun eng ommabop formatlardan biri saqlab qolingan. Bu o‘lcham bir tomondan ekranda kontentni qulay ko‘rish imkonini bersa, ikkinchi tomondan smartfonning qo‘lda ushlashga noqulay bo‘lib ketmasligini ta’minlaydi. Ya’ni kompaniya bu yerda eksperiment qilmadi, balki bozorda o‘zini oqlagan klassik o‘lchamga tayandi.
Texnik tomondan iPhone 17e yangi A19 chipi bilan ishlaydi. Apple va tashqi nashrlar ta’kidicha, bu protsessor unumdorlikni oshirish bilan birga energiya samaradorligini ham yaxshilaydi. Natijada interfeys ravonroq ishlaydi, ilovalar tezroq ochiladi va kundalik vazifalardan tortib nisbatan og‘irroq jarayonlargacha smartfon o‘zini ishonchli tutadi. Qisqasi, bu model “faqat byudjet versiya” emas, balki tezkorlik borasida ham foydalanuvchini uyaltirmaydigan qurilma bo‘lib ko‘rinmoqda.
Kamera qismida ham Apple ancha jiddiy yangilanish qilgan. iPhone 17e 48 megapikselli asosiy Fusion kameraga ega bo‘lib, u 2x optical-quality zoom imkoniyatini ham taqdim etadi. Portret rejimini qayta ishlash sifati yaxshilangani, ayniqsa insonlar, hatto uy hayvonlarini suratga olishda chuqurlik va detallarni aniqroq ushlab berishga yordam berishi aytilmoqda. Bu degani, kundalik suratga olishni yaxshi ko‘radiganlar uchun “e” seriyasidagi telefon avvalgidan ancha jozibador ko‘rinish oldi.
Yana bir muhim yangilik — MagSafe qo‘llab-quvvatlovi. Bu “e” seriyasi uchun birinchi marta taqdim etilgan funksiya bo‘lib, magnitli aksessuarlar va 15W gacha bo‘lgan qulay simsiz quvvatlash imkoniyatini olib keladi. Ilgari aynan shu funksiya yetishmasligi sababli ba’zi foydalanuvchilar arzonroq modeldan voz kechar edi. Endi esa Apple bu bo‘shliqni to‘ldirib, iPhone 17e’ni yanada raqobatbardosh holatga keltirdi.
Sotuv muddatiga kelsak, iPhone 17e uchun oldindan buyurtma 2026-yil 4-mart kuni ochiladi, ochiq sotuvlar esa 11-martdan start oladi. Demak, yangi modelni kutayotganlar uchun ko‘p vaqt qolgani yo‘q. Apple bu smartfon orqali bir narsani aniq ko‘rsatdi: kompaniya endilikda faqat qimmat segmentga emas, balki zamonaviy imkoniyatlarni nisbatan qulay narxda olishni istaydigan katta auditoriyaga ham jiddiy e’tibor qaratmoqda.
“Zamin”ni Telegramʻda oʻqing!
