Shri-Lanka hukumati so'nggi ikkita kiberhujum oqibatida 3 million dollardan ortiq mablag' yo'qotdi. Mamlakat 2022-yildagi qarz inqirozidan tiklanishda davom etmoqda. Bu haqda Techcrunch.com xabar beradi.
AQSh pochta xizmatiga yuborilgan 625 ming dollar miqdoridagi to'lov bir necha hafta davomida yo'qolgan. Rasmiylar bu holatni xakerlar Hindistonga mo'ljallangan boshqa to'lovni burib yuborishga uringanidan so'ng aniqladi.
Avvalroq Shri-Lanka moliya vazirligidan 2,5 million dollar o'g'irlangani xabar qilingan edi. G'aznachilik kotibi xakerlar to'lovlarni mo'ljallangan qabul qiluvchi o'rniga boshqa bank hisoblariga yo'naltirganini ta'kidladi.
Ushbu hodisalar biznes elektron pochta tizimini buzish orqali amalga oshirilgan. Jinoyatchilar hisob raqamlarini o'zgartirish uchun pochta qutilari yoki buxgalteriya tizimlariga kirib boradi.
Hozircha ikkala o'g'irlik o'zaro bog'liqligi aniq emas. Hukumat ushbu kiberjinoyatlar ustidan tergov harakatlarini olib bormoqda.
“Zamin”ni Telegramʻda oʻqing!
