Apple kompaniyasining iPhone 18 Pro smartfonlarida Dynamic Island o'lchami sezilarli darajada qisqaradi. Bu haqda Ixbt.com xabar beradi.
Ta'minot zanjiridagi ma'lumotlarga ko'ra, orolchaning kengligi 20,76 millimetrdan 13,49 millimetrgacha qisqarib, uning maydoni taxminan 35 foizga kichrayadi. Natijada ekranning foydali maydoni 95 foizdan oshadi.
Old kamera yuqori qism markazida qoladi. Ekran diagonallari o'zgarishsiz qoladi: Pro versiyada 6,3 dyuym va Pro Max versiyada 6,9 dyuym.
Shuningdek, Super Retina XDR displeyi yaxshilanib, uning yorqinligi 2600 nitgacha yetishi kutilmoqda. Korpus alyuminiy ramka va matli shishadan iborat bo'lib, qalinligi 8,3-8,9 millimetr atrofida bo'ladi.
Yangi dizaynda to'q qizil, binafsharang va to'q ko'k ranglar taqdim etilishi kutilmoqda. Asosiy kamera uchta moduldan iborat bo'lib, o'zgaruvchan diafragma bilan jihozlanadi.
“Zamin”ni Telegramʻda oʻqing!
